Oralda jasóspirimdi uryp-soǵý deregi boıynsha qylmystyq is qozǵaldy
ORAL. KAZINFORM – Oralda jasóspirimniń soqqyǵa jyǵylǵany jóninde áleýmettik jelide beınejazba tarady.
Beınejazbada eki jasóspirimniń úshinshisin uryp jatqany anyq kórinedi.
BQO polıtsııa departamentiniń baspasóz qyzmetinen málim etkenindeı, atalmysh beınejazba boıynsha Oral qalasy polıtsııa basqarmasy Abaı polıtsııa bóliminiń qyzmetkerleri tekseris júrgizgen.
Oqıǵanyń ótken jyldyń qazan aıynda bolǵany anyqtaldy. Bul derek boıynsha aryz-shaǵym túspegen.
Departamenttiń málimetine qaraǵanda, barlyq qatysýshylar anyqtalyp, polıtsııa bólimine jetkizildi. Jasóspirimder jasaǵan buzaqylyq deregi boıynsha ákimshilik is qozǵaldy.
Jasóspirimderdiń ata-analary ákimshilik jaýapkershilikke tartyldy. Sondaı-aq ata-analardyń kámeletke tolmaǵan balalaryn tárbıeleý jáne bilim berý boıynsha mindetterin oryndamaý deregi boıynsha materıal jınaqtaldy.
- Barlyq materıal kámeletke tolmaǵandar isteri jáne olardyń quqyǵyn qorǵaý jónindegi komıssııanyń qaraýyna jiberildi. Sonymen qatar kámeletke tolmaǵandar jasaǵan quqyq buzýshylyq áreketter týraly habarlamaý deregi boıynsha qalalyq bilim berý bólimi atyna uıǵarym shyǵaryldy. Qazirgi kezde jábirlenýshige qajetti psıhologııalyq kómek kórsetilip jatyr. Onymen psıhologııalyq qoldaý ortalyǵynyń mamandary jumys istep jatr. Oǵan qosa atalǵan derek boıynsha qylmystyq is te qozǵaldy. Qylmystyq isti tergeý barysy polıtsııa departamenti basshylyǵynyń baqylaýynda, - dep habarlady vedomstvodan.
Eske sala keteıik, budan buryn BQO-da bir oqýshy ekinshisine pyshaq suǵyp alǵanyn jazǵan edik.