Oralda jasóspirimniń ózine-ózi qol jumsaǵany týraly málimet jalǵan bolyp shyqty
ORAL. QazAqparat - Oralda jasóspirimniń ózine-ózi qol jumsaǵany týraly málimet jalǵan bolyp shyqty, dep habarlaıdy «QazAqparat» tilshisi.
Áleýmettik jelide «Qymbatty ata-analar, balalardy olardyń baly men baǵasy úshin sókpeńizder. Búgin Oraldaǵy 3-mektepte 4-synyp oqýshysyn (qyz balany) sýıtsıdten aman alyp qaldyq. Test synaǵynan tómen ball alǵandyqtan, úı tóbesinen sekirip ketkisi kelgen. Balalarǵa bárin túzeýge bolatyndyǵyn túsindirińizder. Anasyn shaqyryp, psıhologpen jumys júrgizilýde. Balalardyń ómirine nemquraıly qaramasańyz, osyny barynsha taratyńyz», degen habarlama taralǵan bolatyn.
Osyǵan túsinik bergen qalalyq bilim berý bólimi basshysynyń orynbasary Batıqa Paıdınanyń aıtýynsha, habarlamada sóz bolǵan №3 mekteptiń 4-synybynda baqylaý jumystary ótpegen. Dırektor arqyly anyqtalǵanyndaı, tipti onda nashar oqıtyn oqýshy joq.
«Sondaǵy ata-anaǵa (áıel) habarlama Valdorf baǵytyndaǵy mektep-gımnazııadan kelgen. Ol mekteptegi áıel atalmysh habarlamanyń №9 mekteptegi ata-anadan kelgenin aıtqan. Al Elena esimdi áıel habarlamany kimnen alǵanyn ázirge aıtpaı otyr. Dúısenbide atalǵan mektepter dırektorlarynyń baıanhattary men ata-analardyń túsiniktemeleri negizinde máseleniń mán-jaıyn tolyq anyqtaý úshin ishki ister organyna aryz túsiretin bolamyz», dedi «QazAqparat» tilshisine B.Paıdına.
