Oralda jas jigitti pyshaqtap óltirgen kúdikti ustaldy
ORAL. QazAqparat – Oralda jas jigitti pyshaqtap óltirgen kúdikti ustaldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen málim etkenindeı, oqıǵa 19 mamyr kúni saǵat 04.22-de «Alı» kafesi janynda boldy.
«Belgisiz bireý 1995 jylǵy jigitti pyshaqtap ketken. Alǵan jaraqattary saldarynan marqum aýrýhanada kóz jumdy. BQO polıtsııa departamenti krımınaldyq polıtsııasy júrgizgen jedel is-sharalar nátıjesinde 19 jastaǵy kúdikti qolǵa túsip, ýaqytsha ustaý ızolıatoryna qamaldy. Qazirgi kezde QR QK 99-baby 1-bóligine (kisi óltirý) sáıkes sotqa deıingi tergeý amaldary júrgizilýde. Barlyq tıisti saraptamalar taǵaıyndaldy. Basqa aqparat QR Qylmystyq is júrgizý kodeksiniń 201-babyna sáıkes jarııalaýǵa jatpaıdy», dep habarlady vedomstvodan.
Eske sala keteıik, budan buryn Oralda avtobýsta kondýktorlarǵa qol jumsaǵan buzaqylar ustalǵanyn jazǵan bolatynbyz.
Sondaı-aq Oralda joǵalyp ketken jasóspirim aman-esen tabyldy.
