Oralda jas jigit óziniń esimi men tegin qazaqshaǵa sot arqyly ózgertip aldy

ORAL. KAZINFORM – Oral qalasynyń 22 jastaǵy turǵyny qazaq álipbıine sáıkes óz esiminiń jazylýyn «Sýltan» emes, «Sultan» dep ózgertip, asyrap alǵan ákesiniń tegin alyp, Muratuly dep jazý týraly sheshimge kelgen.

BQO sotynyń baspasóz qyzmetinen málim etkenindeı, asyrap alyp, tárbıelegen ákesi balasy kámeletke tolǵanǵa deıin qaıtys bolǵan.

Jas jigit óziniń týǵan ákesin eshqashan bilmegenin, al anasy ata-ana quqyǵynan aıyrylǵanyn túsindirgen.

«Azamattarǵa arnalǵan úkimet» memlekettik korporatsııasy bala asyrap alýshynyń talap qoıýshyny bar bolǵany alty aı tárbıelegenin, bul jetkiliksiz merzim dep tanylǵanyn alǵa tartyp, aryzdy qanaǵattandyrýdan bas tartqan. Esimniń árpin («Sýltan»-dy “Sultan» dep) ózgertýden bas tartýdy esh negizdemegen.

Memlekettik mekemeniń sheshimimen kelispegen jas jigit sotqa júgingen.

Birinshi satydaǵy sot memlekettik organnyń áreketin zańdy dep tanyp, talap qoıýdy qanaǵattandyrýdan bas tartqan.

Alaıda apellıatsııalyq sot bul sheshimniń kúshin joıyp, memlekettik organnyń bas tartýyn zańsyz dep tanyp, talapkerdiń talabyn qanaǵattandyrdy. Óıtkeni «Neke (erli-zaıyptylyq) jáne otbasy týraly» Kodekstiń 257-babynyń normasyna sáıkes, ótinish berýshi ózin is júzinde tárbıelegen adamnyń tegin nemese ákesiniń atyn alýǵa quqyly. Zań balany tárbıeleý faktisin rastaý úshin qajetti eń az ýaqyt kezeńin belgilemeıdi. 

- Bul rette talap qoıýshy kámeletke tolmaǵan kezde asyrap alýshy qaıtys bolǵan, bul tegin ózgertýge kedergi bola almaıdy. Ataýǵa keletin bolsaq, sot áripti aýystyrýdan bas tartýǵa zańdy negizderdiń joqtyǵyn atap ótti, sondyqtan talap qoıýshynyń talaptary zańdy dep tanyldy. Apellıatsııalyq satydaǵy sottyń sheshimine shaǵym jasalmaǵan jáne zańdy kúshine engen, - dep habarlady vedomstvodan.

Eske sala keteıik, budan buryn Oral qalasynyń ákimi úıi sýǵa ketken turǵynǵa 2,2 mln teńge tóleıtinin jazǵan bolatynbyz.