Oralda jas tártip saqshylary men olardyń tálimgerleri bas qosty
ORAL. QazAqparat - Oral qalasynda Elbasy tapsyrmasyna sáıkes kadr saıasatyn odan ári jetildirý maqsatynda BQO ishki ister departamenti jas tártip saqshylary men olardyń tálimgerleriniń sletin ótkizdi, dep habarlaıdy «QazAqparat» tilshisi.
Departamenttiń baspasóz qyzmetinen túsken málimetke qaraǵanda, qyzmetke qabyldanǵanyna kóp bola qoımaǵan jas mamandardy quttyqtaǵan departament bastyǵynyń orynbasary, polıtsııa podpolkovnıgi Baǵdar Ábýovtiń atap ótkenindeı, jyl saıyn uıymdastyrylatyn atalmysh sharanyń mańyzy zor. Ásirese, ol jas mamandardyń kásibı shyńdalýyna, jeke quramdy patrıottyq rýhta tárbıeleýge ıgi yqpalyn tıgizedi. Bir jyl ishinde 180 jas maman qyzmetke qabyldansa, sonyń 30-y QR ІІM joǵary oqý oryndaryn támamdaǵan. Olardyń árqaısysyna tálimger bekitilgen. Osy sharaǵa 150 qyzmetker qatyssa, sonyń 47-si - tálimger, 107-si - jas mamandar.
Jıynda sondaı-aq departament ardagerler keńesiniń tóraǵasy Jaılybaı Adaev, kadr jumysy basqarmasynyń bastyǵy, polıtsııa polkovnıgi Janbolat Musadıev, Oral qalalyq ishki ister basqarmasy bastyǵynyń orynbasary, polıtsııa polkovnıgi Naýryzbaı Ǵumarov sóz alyp, tájirıbelerimen bólisti. 
Shara kezinde eńbek tájirıbesi mol, kásibı sheberligi shyńdalǵan ozyq tálimgerler men úzdik jas mamandar marapattaldy. Sol sekildi qysyltaıań kezde qarapaıym azamattarǵa qolushyn sozyp, erligimen «Qazirgi zaman qaharmany atanǵan Syrym aýdandyq ishki ister bóliminiń ýchaskelik polıtsııa ınspektory Edires Zeınýllın, Oral qalalyq ishki ister basqarmasy jergilikti polıtsııa qyzmetiniń qyzmetkeri Muhıt Ábilqaıyrov, ІІD tergeý basqarmasynyń júrgizýshi-polıtseıi Ǵabıt Nuǵmanov syndy tártip saqshylary jas mamandarǵa úlgi etildi.
Sletke qatysýshylar BQO ІІD quqyqtyq tártipti qamtamasyz etý jáne arnaıy daıyndyq bazasynyń aýmaǵynda Halyq qaharmany Ǵazız Baıtasovtyń jáne qyzmettik mindetterin atqarý kezinde qaza bolǵan batysqazaqstandyq saqshylardyń qurmetine ornatylǵan memorıaldyq keshende bolyp, oblystyq qazaq drama teatrynda Sherhan Murtazanyń Baýyrjan Momyshuly týraly jazylǵan «Noqtaǵa basy syımaǵan» týyndysy negizinde qoıylǵan spektakldi tamashalady.
