Oralda jas sarbazdar is-sharasyna 700-ge jýyq oqýshy qatysty

ORAL. QazAqparat – Oral qalasynda «Máńgilik alaý» janynda Otan qorǵaýshylar kúnine oraı jas sarbazdar patrıottyq is-sharasy ótkizildi, dep habarlaıdy QazAqparat tilshisi.

Alańda mektep oqýshylary sapqa turdy. Qala ákimi Mırjan Satqanov bul is-sharanyń mańyzdylyǵyn atap kórsetip, óskeleń urpaqty mektep jasynan bastap Otandy qorǵaýǵa úıretý qajettigin jetkizdi.

«Mundaǵy maqsat – jasóspirimderdi Qarýly kúshter qatarynda boryshtaryn óteýge daıyndap, otansúıgishtikke tárbıeleý. Patrıottyq aktsııaǵa qala mektepterinen 700-ge jýyq oqýshy qatysty. Qazirgi tańda Oralda 50 mektepte patrıottyq klýbtar jumys jasaıdy. Úsh mektepte «Jas sarbaz» synyby ashyldy. Bul synyptarda oqýshylar bilim alýmen qatar, áskerı ónerdiń alǵashqy álippesin qosa meńgeredi. Aldaǵy ýaqytta osyndaı taǵy 5 «Jas sarbaz» synybyn ashý kózdelip otyr. Oqýshylardyń boıynda patrıotızmdi qalyptastyrý maqsatynda Oral qalasynda oqý-dalalyq jıyny ótkizidlip, oǵan 1 200 oqýshy qatysty», - dedi shahar basshysy.

Jıynda Qazaqstan Respýblıkasy Qarýly kúshteri men áskerı qurylymdary kıim úlgileriniń kórsetilimi usynyldy. Sonymen qatar, BQO polıtsııa departamentiniń jyldam qımyldaıtyn arnaıy jasaǵy jumys barysynda qoldanatyn ádisterin kórsetti.

Patrıottyq aktsııa balalar men jasóspirimder arasynda jol-kólik apatynyń aldyn alý, jolda júrý erejesiniń saqtalýyn qadaǵalaý maqsatynda qurylǵan áskerı-patrıottyq klýbtar men jas jol saqshylarynyń saptyq kórsetilimimen jalǵasty.

Oblystyq bilim basqarmasynan alynǵan málimetke qaraǵanda, Otan qorǵaýshylar kúni men Jeńis meıramy qarsańynda barlyq mektepterde erlik sabaqtary uıymdastyryldy.

Eske sala keteıik, budan buryn BQO-da Jeńis kúnine oraı 5 myńnan astam adamǵa materıaldyq kómek kórsetilgenin jazǵan bolatynbyz.

Sondaı-aq, Oralda «Er – eldiń qorǵany» atty merekelik is-shara ótti.

QazAqparat. Batys Qazaqstan.

Foto: Dınara Nasyr