Oralda jarylys bolǵan kafeni jalǵa alýshyǵa úkim shyqty

ORAL. KAZINFORM — Oral qalalyq sotynda «Rizyq» kafesindegi jarylysqa qatysty qylmystyq is boıynsha úkim shyqty.

BQO sotynyń baspasóz qyzmetinen málim etkenindeı, kafeni jalǵa alýshy kásipker Meńdibek Ýálıev QR QK 292-baby 3-bóligine (eki jáne odan kóp adamnyń ólimine soqtyrǵan órt qaýipsizdigi erejelerin buzý) sáıkes aıypty dep tanylyp, oǵan bes jylǵa bas bostandyǵynan aıyrý jazasyn qaýipsizdigi tómen qylmystyq-atqarý júıesi mekemesinde óteý jazasy kesildi.

Sottalýshy, sondaı-aq, úsh jyl merzimge kásiporyndarda ákimshilik-sharýashylyq, uıymdastyrý-bólý qyzmetine qatysty laýazymdy atqarý quqyǵynan aıyryldy.

M.Ýálıevti qamaýda ustaý túrindegi bultartpaý sharasy sot úkimi zańdy kúshine engenge deıin qaldyryldy.

Sot talqysynda anyqtalǵanyndaı, M.Ýálıev gaz ballondaryn alyp, kafe ǵımaratynyń kireberisindegi tandyr peshinde samsa pisirýge paıdalanǵan. Ol órt qaýipsizdigin saqtaý boıynsha jaýapty tulǵa bola tura, gaz ballonynyń qaýip kózi ekendigin bilgenimen, salǵyrttyq tanytyp, tótenshe jaǵdaıdyń aldyn almaǵan.

Bıylǵy 3 qańtardan 4-ine qaraǵan túni M.Ýálıev gaz ballondarynyń «Rizyq» kafesinde jumys kezinde turýyna jol bergen. Sodan keıin gaz ballony jarylyp, aýdany 110 sharshy metr qos qabatty ǵımarattyń ishinara oń jaq qabyrǵasy men tóbesi qırap, 25 sharshy metr aýmaǵy otqa orandy.

Saldarynan oqıǵa ornynan úsh adamnyń múrdesi tabylyp, taǵy tórt adam aýyr jáne ortasha aýyr jaraqat aldy.

Sot úkimi kúshine engen joq.

Eske sala keteıik, budan buryn kafedegi jarylysqa qatysty Oralda qylmystyq is boıynsha aldyn ala tyńdaý bolǵanyn jazǵan edik.