Oralda jantúrshigerlik jol-kólik oqıǵasyn jasaǵan júrgizýshi mas bolyp shyqty
QazAqparat budan buryn jazǵanyndaı, Oralda 5 aqpan kúngi jantúrshigerlik jol apatynan 33 jastaǵy júrgizýshi mert bolǵan edi.
Saǵat 02.30 shamasynda 28 jastaǵy júrgizýshi «Toıota Kamrı» avtokóligimen baǵdarshamda toqtap turǵan «Aýdı-80»-dy soqqan bolatyn. Sonyń saldarynan «Aýdı-80» avtokóliginiń 33 jastaǵy júrgizýshisi oqıǵa ornynda kóz jumdy.
BQO polıtsııa departamentiniń baspasóz qyzmetinen málim etkenindeı, Ábilqaıyr han dańǵyly boıynda jol-kólik oqıǵasyn jasaǵan «Toıota Kamrı» avtokóliginiń 28 jastaǵy júrgizýshisi QR Qylmystyq is júrgizý kodeksiniń 128-baby tártibinde ustalyp, Oral qalalyq kópbeıindi aýrýhanasynyń arnaıy palatasyna ornalastyryldy.
«9 aqpan kúni shyqqan sot-hımııalyq saraptama qorytyndysyna sáıkes adam ólimine ákep soqtyrǵan jol apaty kezinde atalǵan júrgizýshi mas kúıinde bolǵan. Qylmystyq is QR QK 345-1-baby 3-bóliminde qaıta saralandy. Bul bap boıynsha aıypty dep tanylǵan adam belgili bir laýazymdardy atqarý nemese belgili bir qyzmetpen aınalysý quqyǵynan on jyl merzimge aıyra otyryp, jeti jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrýǵa jazalanady», dep habarlady vedomstvodan.
Atalǵan oqıǵa saldarynan qaza tapqan 33 jastaǵy er adamnyń sońynda anasy, jary jáne úsh balasy qaldy.
