Oralda jansaqtaý bólimine túsken er adamnyń jaǵdaıy aýyr, ota jasaldy

ORAL. QazAqparat – Oral qalasynda velosıped mingen er adamdy avtokólik qaǵyp ketti, dep habarlaıdy QazAqparat tilshisi.

BQO polıtsııa departamentiniń resmı ókili Bolatbek Nurǵojın málim etkendeı, oqıǵa 2 maýsym kúni keshkisin Pýgachev pen Isataı-Mahambet kósheleriniń qıylysynda boldy.

«Lada Prıora» avtokóligi Jáńgir han kóshesine qaraı burylǵan mezette Pýgachev kóshesi jaqtan kelip qalǵan velosıpedshini qaǵyp ketti.

Oblystyq densaýlyq saqtaý basqarmasy baspasóz qyzmetiniń naqtylaýynsha, jedel járdem brıgadasy saǵat 20.59-da jetti.

Aldyn ala málimetke qaraǵanda, 45 jastaǵy er adam jabyq bas-mı jaraqatyn alǵan. Mıyna zaqym kelip, samaıynan da jaraqat alǵan. Jansaqtaý bólimine túsken er adamnyń jaǵdaıy aýyr. Ota jasaldy.

Eske sala keteıik, budan buryn Oralda naýqasty aýrýhanaǵa apara jatqan sanıtarlyq kóliktiń jol apatyna ushyraǵanyn jazǵan bolatynbyz.

Sondaı-aq BQO turǵyny quny 4,5 mln astam teńge turatyn kıikti tirideı ustap alǵan.