Oralda «Jáńgir han» sport kesheni ashyldy
ORAL. QazAqparat – Oralda Táýelsizdik kúnine oraı Jáńgir han atyndaǵy Batys Qazaqstan agrarlyq-tehnıkalyq ýnıversıteti aýmaǵynda «Jáńgir han» sport kesheni ashyldy, dep habarlaıdy QazAqparat tilshisi.
Onyń ashylý rásimine qatysqan oblys ákimi Ǵalı Esqalıevtiń atap ótkenindeı, bul ýnıversıtet oqytýshylary men stýdentteri ǵana emes, Zashaǵan kentiniń turǵyndary úshin de qýanyshty jańalyq boldy.
«Ata-babalarymyz azattyq úshin alysyp, álemde jer kólemi jóninen toǵyzynshy oryn alatyn elimizdi saqtap, osy kúnge jetkizse, Qazaqstanymyzdyń odan ári damýy búgingi urpaqqa baılanysty. Ol úshin ár azamat bilikti maman, patrıottyq rýhy kúshti, deni saý adam bolýy kerek. Óńirde sport keshenderin salýǵa jeke kásipkerler de atsalysyp, turǵyndar úshin sport keshenderin iske qosyp jatyr. Bul zalǵa da turǵyndar kelip, jeńildikpen abonent alyp, óz densaýlyqtaryn shyńdaı alady», dedi óńir basshysy.
Ýnıversıtet rektory Asqar Nametovtiń aıtýynsha, salaýatty ómir saltyn ornyqtyrý, stýdentter men oqytýshylardyń sportpen aınalysýyna jaǵdaı týǵyzý maqsatynda qolǵa alynǵan bul joba eki jylǵa eseptelgen. Aldaǵy jyly oryndyqtarymen stadıon, eki jazǵy alań salynatyn bolady. Onyń bireýi fýtzal, ekinshisi voleıbol alańy bolmaq. Munyń báriniń jalpy quny – 429 mln teńge. Sonyń ishinde qural-jabdyqtarymen qosa alǵanda, sport keshenine 229 mln teńge jumsaldy. Keshende voleıbol, fýtbol, fıtnes, gımnastıka zaldary bar. Munda turǵyndar da kelip, jattyǵa alady.
Eske sala keteıik, budan buryn Batys Qazaqstanda mádenı-sport kesheni, Oralda toǵyz qabatty jańa úıdiń paıdalanýǵa berilgenin jazǵan edik.
