Oralda jańbyr kezinde nelikten asfalt tóselip jatyr – ákimdik jaýap berdi
ORAL. KAZINFORM — Oral qalasynda Isataı batyr kóshesinde jańbyr kezinde asfalt tóselip jatqany jóninde áleýmettik jelide beınejazba jarııalandy.
Qala turǵynynyń aıtýynsha, qysqa salym, jaýyn-shashynnan keıin, aýa raıynyń qolaısyz kezinde asfalt tóseý qanshalyqty durys.
- Jaz boıy nege istelmegen? Der kezinde jumys jasalmaǵandyqtan, jol sapasyz. Shuńqyrlar paıda bolady, - deıdi turǵyn.
Áleýmettik jeli arqyly taralǵan taǵy bir beınejazbada atalǵan jumystyń jańbyr jaýyp turǵan kóz baılanǵan mezgilde jasalyp jatqany túsirilgen.
Osyǵan oraı Kazinform tilshisi Oral qalasy ákimdigine arnaıy saýal joldaǵan edi.
Ákimdik málimetine qaraǵanda, Isataı batyr kóshesinde merdiger «Jaıyq Sıtı» JShS tarapynan asfaltbeton jabynyn tóseý jumystary júrgizilýde.
Ákimdiktiń málimdeýinshe, bul ýaqytta atmosferalyq jaýyn-shashyn bolǵan joq. Asfaltbeton qospasyn tóseý aldynda jol negizine bıtým emýlsııasy jaǵyldy.
Nysanda merdiger uıymnyń ókilderi men tehnıkalyq qadaǵalaý mamandary boldy. Jaýapty mamandardyń baǵalaýynsha, aýa raıy jaǵdaıy asfalt tóseý jumystaryn júrgizýge múmkindik bergen.
Jumystardyń tehnologııalyq talaptarǵa sáıkestigi men oryndalý sapasy tehnıkalyq qadaǵalaý tarapynan baqylaýda.
Sonymen qatar № 8 orta mektep aýdanynda Jezqazǵan kóshesiniń turǵyndary mıdaı batpaqtyń saldarynan qatynastyń qıyndaǵanyn aıtyp shaǵymdandy. Olar Jezqazǵan kóshesindegi №24, 26 jáne 28 úıler mańynda jol jabynyn jóndeý máselesi sheshilmeı kele jatqanyn jetkizdi.
Qala ákimdiginiń aqparatyna sáıkes mundaǵy jóndeýdi qajet etetin jol ýchaskesiniń uzyndyǵy – shamamen 130–150 metr. Jumys kóleminiń azdyǵyna baılanysty atalǵan ýchaskege jobalyq-smetalyq qujattama ázirlenbegen.
- Degenmen, atalǵan aýmaqtaǵy jol jabynynyń jaǵdaıyn jaqsartý máselesi nazarǵa alynǵan. Kelesi jyly Oral-Jelaev tasjolyn ortasha jóndeý jumystary jalǵasqan kezde joldy frezerleý barysynda alynǵan materıaldy osy ýchaskege tóseý josparlanýda. Bul jumystar joldyń jaǵdaıyn jaqsartýǵa, turǵyndardyń qatynaýyna qolaıly jaǵdaı jasaýǵa jáne kólik qozǵalysynyń qaýipsizdigin arttyrýǵa múmkindik beredi, - delingen ákimdik jaýabynda.
Eske sala keteıik, budan buryn Oralda turǵyndar úılerge jylýdyń berilmeı otyrǵanyn aıtyp shaǵymdanǵanyn jazǵan edik.