Oralda jańartylǵan Jaıyq ózeni jaǵalaýynyń bir bóligi jeke menshikte ekendigi ras pa
ORAL. KAZINFORM — Oral qalasynda bıyl Jeńis alańy mańyndaǵy Jaıyq ózeniniń jaǵalaýy qaıta jańartýdan ótkizildi.
Áleýmettik jelide osy jaǵalaýdyń bir bóligi jeke menshikte ekendigi týraly málimet taraǵan edi.
Osyǵan baılanysty Kazinform tilshisi Oral qalasy ákimdigine arnaıy saýal joldady.
Vedomstvodan alynǵan málimetke qaraǵanda, Jeńis alańy (Stella) aýdanynda ornalasqan jalpy aýdany 3,8984 ga jer telimi demalys aımaǵy qurylysy úshin Oral qalasy ákimdiginiń 2005 jylǵy 3 aqpandaǵy № 114 qaýlysymen jeke menshikke berilgen. Keıin bul ýchaske 12 jer telimine bólingen.
2005-2008 jyldary atalǵan qaýlyny zańsyz dep taný týraly másele birneshe ret kóterilip, materıaldy sot organdary qaraǵan. Nátıjesinde Joǵarǵy sot qaýlyny zańdy dep tapqan.
Sonyń ishinde 2,1793 ga jer teliminiń ıesi 2024 jyldyń tamyzynda aýmaqty ıgerýge kirisip, jasyl jelekti otaı bastaǵan.
Bul jurtshylyqtyń alańdaýshylyǵyn týǵyzyp, Oral qalasy ákimdigi shaǵymdardy tekserdi.
Sonyń qorytyndysymen ýchaskege qatysty quqyqtyq qujattar zańdy bolyp shyqty.
Alaıda atalǵan aýmaqtyń qoǵamdyq mańyzdylyǵyn eskere otyryp, ákimdik ony memleket muqtajyna keri qaıtarý týraly sheshim qabyldady.
Ótken jyldyń 28 qazanynda tender qorytyndysy boıynsha atalǵan ýchaskeniń naryqtyq qunyn 599 mln 518 myń teńge kóleminde belgilegen JShS jeńimpaz dep tanyldy.
Oǵan qosa bul jumysqa Ádilet mınıstrliginiń «Sot saraptamalary ortalyǵy» RMK Batys Qazaqstan fılıaly da tartyldy. Memlekettik saraptama qorytyndysyna sáıkes ýchaskeniń naryqtyq quny 591 mln 853,204 myń teńge bolyp shyqty.
Budan keıin menshik ıelerine atalǵan jerdiń ornyna qalanyń ortalyǵynan quny 248 mln 869,980 myń teńge bolatyn basqa balama jer telimi usynyldy. Baǵadaǵy aıyrmashylyqqa qaramastan, menshik ıeleri buǵan kelisip, jer ýchaskesi memleketke qaıtaryldy.
— Jaıyq ózeni jaǵalaýyndaǵy qalǵan 11 jer telimi jeke jáne zańdy tulǵalardyń menshiginde. Kúni búgin Oral qalasy ákimdigi tarapynan quqyqtyq retteýdi qosqanda, atalǵan jer telimderin odan ári paıdalanýǵa qatysty máseleler qarastyrylyp jatyr. Al Jaıyq ózeni jaǵalaýynyń bıyl qaıtadan jańartylǵan ýchaskesi jeke menshikte emes. Mundaǵy abattandyrý jumystaryna bıýdjetten 1,3 mlrd teńge jumsaldy, — delingen resmı jaýapta.
Osy jaǵalaýǵa baılanysty qala turǵyny Mereke Káýkeshev óz pikirin bildirdi.
— Mundaı jumystar buryn da jasalǵan. Alaıda ótken jylǵy alapat sý tasqyny kezinde bári sýǵa ketti. Aldaǵy ýaqytta osyndaı jaǵdaı qaıtalanbasyna kim kepildik beredi. Sondyqtan áýeli Jaıyqtyń jaǵasyn bıiktetip alyp, sosyn jasaý kerek pe edi, — dedi Mereke Káýkeshev.
Eske sala keteıik, budan buryn Oralda turǵyndar jol joqtyǵyn, kóshe qarańǵy ekendigin aıtyp shaǵymdanǵanyn jazǵan bolatynbyz.