Oralda jańadan juqpaly aýrýlar aýrýhanasy boı kótermek
ORAL. QazAqparat – Oralda jańadan modýldik juqpaly aýrýlar aýrýhanasy boı kótermek, dep habarlaıdy QazAqparat tilshisi.
BQO ekonomıka jáne bıýdjettik josparlaý basqarmasynyń basshysy Tilepbergen Qaıýpovtyń aıtýynsha, bul maqsatqa oblys qazynasynan 4,2 mlrd teńge qarastyryldy.
Sonyń ishinde daıyn modýldik qurylǵyny satyp alý jáne qurylys-montaj jumystaryna 2 mlrd teńge bólindi. Oǵan qosa «Jumyspen qamtýdyń jol kartasy» baǵdarlamasy aıasynda únemdelgen qarajatty qaıta bólý arqyly atalǵan nysan qurylysyna 2,2 mlrd teńge baǵyttaldy.
«Oblystyq máslıhattyń kezekten tys 37-sessııasynda óńir bıýdjeti 3 mlrd teńgege naqtylandy. Shyǵyndar birinshi kezekte koronavırýspen kúres sharalaryn qarjylandyrýǵa joldandy. Modýldik aýrýhanaǵa qosa oblystaǵy ınfektsııalyq jáne provızorlyq statsıonarlarǵa medıtsınalyq jabdyqtar satyp alýǵa 603 mln teńge qaraldy. Sondaı-aq jergilikti atqarýshy organnyń rezervin tolyqtyrýǵa 200 mln, oblys mektepterin keń jolaqty ınternetpen qamtamasyz etý jáne jyldamdyǵyn ulǵaıtýǵa 56 mln teńge berildi. Qazirgi kezde oblystyq bıýdjet 250 mlrd teńgeni qurap otyr», dedi QazAqparat tilshisine T.Qaıýpov.
Eske sala keteıik, budan buryn BQO-da volonterler shyn muqtajdarǵa kómek kórsetkenin jazǵan bolatynbyz.
