Oralda jańadan mádenıet saraıy salynyp jatyr
ORAL. QazAqparat – Oralda jańadan 926 oryndyq mádenıet saraıy boı kóterýde, dep habarlaıdy QazAqparat tilshisi.
Oblys ákimi Ǵalı Esqalıev shaharda jańadan salynyp jatqan birqatar nysandar, sonyń ishinde mádenıet saraıynyń qurylysymen tanysty.
Oblystyq mádenıet basqarmasynyń basshysy Saıran Dúısenteginiń aıtýynsha, mádenıet saraıy tuńǵysh Prezıdent alańy janynda qalaǵa erekshe kórik bermek. Qadyr Myrza Álı atyndaǵy oblystyq mádenıet jáne óner ortalyǵy da osy jerde.
Úsh qabatty mádenıet saraıy paıdalanýǵa berilgen kezde sheteldik, sondaı-aq elimizdegi belgili ánshiler kelip, kontsert berýine múmkindik týady. Kópbeıindi mádenıet saraıynda oblys ákiminiń estradalyq-sımfonııalyq orkestri, jastar mýzyka teatry, bıshiler, etnografııalyq-folklorlyq, vokaldy aspaptar ansamblderi, sýretter galereıasy jáne basqa óner ujymdary ornalasady. Akýstıka, dybys, jaryq apparatýralary eýropalyq talaptarǵa saı bolmaq.
Kórermenderge arnalǵan 926 orynnyń 120-sy balkonda bolmaq. Sahnanyń ózindik erekshelikteri bar. ıAǵnı orkestr qajet bolǵanda, sahna kóteriledi. Orkestr tómende bolady.
Óńir basshysy merdiger mekeme «Altaır» JShS-ǵa aldaǵy jyly márege jetetin qurylysty sapaly bitirýdi tapsyrdy. Sonymen qatar jańa mádenıet saraıyna jańa at oılaý kerektigi de aıtyldy.
Osyǵan oraı dástúrli ánshi Ernar Ómiráli, aqyn, Qazaqstan Jazýshylar odaǵynyń múshesi Darıǵa Mushtanova Feısbýktegi paraqshalarynda mádenıet saraıyn úsh júzge án ozdyrǵan ataqty ánshi Muhıt Meráliulynyń qurmetine «Sal Muhıt saraıy» dep ataýdy usyndy. Keler jyly Muhıt Meráliulynyń 180 jyldyǵy atalyp ótiletin bolady.
