Oralda jańa jyl qarsańynda kóńil kóterý oryndaryn baqylaý kúsheıtildi

Qala ákiminiń orynbasary Mıras Múlkáıdiń oblys ákimdiginde ótken koronavırýsqa qarsy kúres jónindegi jedel shtab otyrysynda málim etkenindeı, 25 jeltoqsannan bastap kún saıyn 7 mobıldi top kafeler men meıramhanalarda shekteý sharalarynyń saqtalýyn qadaǵalaýda.

Onyń sózine qaraǵanda, 26-27 jeltoqsan kúnderi kóńil kóterý oryndarynda túngi mezgilde kóp adamnyń qatysýymen 6 keshtiń ótkeni anyqtaldy. Atap aıtqanda, karantındik talapty buzyp, korporatıvtik kesh ótkizgen «Ál-Farabı», «Elıs», «Pınta», «Devıchıa bashnıa», «Bang» jáne «Kaktýs» kafe-meıramhanalarynyń ıelerine ákimshilik hattama toltyrylyp, tıisti shara qabyldaý úshin qalalyq sanıtarlyq-epıdemıologııalyq baqylaý basqarmasyna jiberildi.

Korporatıvtik keshterdi anyqtaý maqsatynda monıtorıngtik toptar osy kúnderi kúsheıtilgen rejımde jumys isteýde.

Jeltoqsan aıynyń basynan beri karantın tártibin saqtamaýdyń 57 deregi anyqtalsa, sonyń ishinde 13 nysan jumys rejımin buzǵan. 44 buzýshylyqqa turǵyndar barǵan.
Sol sekildi avtobýstarda da osyndaı jumystar júrgizilýde. 1-28 jeltoqsan aralyǵynda sanıtarlyq talapty buzýǵa qatysty 8 derek belgili boldy. Qoǵamdyq kólik salondaryn mindetti túrde dezınfektsııalaý tártibi engizildi. Qazirgi kezde sońǵy aıaldamalarda júrgizýshiler men kondýktorlar avtobýs salonyn arnaıy hımııalyq eritindimen óńdeıdi.

Turǵyndarǵa túngi saǵat 00.00-den bastap 06.00-ge deıin jeke kólikterimen júrýge shekteý qoıylǵany málim. Bul talap 59 márte buzylyp, 9 derek boıynsha 375 myń teńge aıyppul salynǵan. 27 ákimshilik is jabylsa, 23-i boıynsha tıisti shara endi qabyldanady.

Qyrkúıek aıynan beri monıtorıngtik toptardyń jumysy nátıjesinde kóńil kóterý oryndarynyń ıelerine 127 hattama toltyrylyp, 9,8 mln teńge aıyppul salyndy. Sot sheshimimen alty kafe, meıramhana úsh aı merzimge jabyldy.

Eske sala keteıik, budan buryn BQO-da koronavırýs juqtyrǵandardyń 88 paıyzy jazylyp shyqqanyn jazǵan bolatynbyz.