Oralda jańa zamanaýı mektep qoldanysqa berildi
ORAL. KAZINFORM – Táýelsizdik kúni qarsańynda Oralda 400 orynǵa laıyqtalǵan jańa mektep paıdalanýǵa berildi. Qaladaǵy №31 mekteptiń saltanatty ashylýyna oblys ákimi Narıman Tóreǵalıev qatysyp, mektep ujymyn, oqýshylar men ata-analardy jańa bilim ordasynyń iske qosylýymen quttyqtady. Bul týraly BQO ákimdiginiń baspasóz qyzmeti habarlady.
– Memleket basshysynyń alǵa qoıyp otyrǵan basty mindetteriniń biri – jas urpaqtyń sapaly bilim alýyna jaǵdaı jasaý. Osy baǵytta oblysymyzda jańa mektepter salynyp, bilim oshaqtaryna kúrdeli jóndeý jumystary júrgizilýde. Batys Qazaqstan oblysynda sońǵy eki jylda 22 jańa orta mektep boı kóterdi. Atap aıtqanda, 2023 jyly jyly 16 jańa mekteptiń qurylysy aıaqtalyp, paıdalanýǵa berilse, 2024 jyly jańa 6 mektep salynyp, aıaqtalýda. Sonymen birge, «Jaıly mektep» jobasy aıasynda 6 mekteptiń qurylysy 2025 jyly jalǵasady, - dedi Narıman Tóreǵalıev.
Jańadan salynǵan tórt qabatty bilim ordasy zamanaýı quraldarmen jabdyqtalǵan. Jalpy kólemi 17 271 sharshy metrdi quraıtyn mektepte bir sport zal, akt zal, kitaphana, ashana, medbıke bólmesi sheberhanalar bar. Kabınetterge touch-ekrandar ornatylyp, joǵary jyldamdyqtaǵy ınternetke qosylý múmkindigi beriledi.
Synyptar zamanaýı kompıýterlermen jáne ınteraktıvti taqtalarmen qamtamasyz etilgen. Sonymen qatar múmkindigi shekteýli balalar úshin de jaǵdaılar jasalǵan: pandýstar, lıft, arnaıy dárethana jáne ınklıýzıvti bilim berý kabıneti bar.
Mektep aýmaǵynda fýtbol, basketbol jáne voleıbol alańdary da bar.
– Búgin óte qýanyshty kún. №31 mekteptiń qurylysynyń aıaqtalǵanyna qýanyshtymyz. Balalarymyz úshin zamanýı úlgidegi jańa bilis qoldanysqa berildi. Memleket basshysyna jáne qurylys jumystaryna atsalysqan jandarǵa shynaıy alǵysymdy bildiremin. Balalarymyz bolashaqta elimizdiń maqtanyshyna aınalyp, ózderiniń alǵan bilimderimen memleketimizdiń damýyna óz úlesterin qosady dep senemin, - dedi ata-ana Gúlnar Qajymova.