Oralda jańa úılengen 20 jastaǵy jigit shatyrdan sekirmek boldy
ORAL. QazAqparat – Oralda jańa úılengen jas jigit besinshi qabattan sekirip ketpek boldy, dep habarlaıdy QazAqparat tilshisi.
Batys Qazaqstan oblystyq Polıtsııa departamentiniń baspasóz qyzmetinen túsken málimetke qaraǵanda, oqıǵa 19 qańtar kúni boldy.
Saǵat 04.27-de Prostornaıa kóshesinde bes qabatty úıdiń shatyryna shyǵyp alǵan er adamnyń sekirýi múmkin ekeni týraly «102»-ge habarlanǵan.
Oral qalasy polıtsııa basqarmasy patrýldik polıtsııa batalonynyń vzvod komandıri Muhıt Ábilqaıyrovtyń aıtýynsha, tártip saqshylary oqıǵa ornyna dereý jetken.
Olar kópqabatty úıdiń shatyrynan barǵanda jigit «Anamdy shaqyryńyzdarshy, men ony jaqsy kóremin, qoshtasqym keledi» dep aıǵaılaǵan kórinedi.
«Men qutqarýshylardy shaqyrdym. Sosyn shapshań árket etetin arnaıy jasaq qyzmetkerimen birge tóbege kóterildim. Mundaı oqıǵamen betpe-bet kelýim birinshi ret emes. Sondyqtan birden ony sózge tarttym. 18 qańtar kúni onyń úılený toıy ótkenin, ile-shala áıelimen ursysyp qalyp, osyndaı tosyn qadamǵa barmaq bolǵanyn bildim. Keıin, shatyrdyń shetinde turǵan ol, meni syılaıtynyn aıtyp, qolyn berdi. Sol boıda qolynan tarttym, arnaıy jasaq qyzmetkeri de maǵan kómektesti», - dedi M.Ábilqaıyrov.
Oqıǵa ornyna BQO Tótenshe jaǵdaılar departamentiniń qyzmetkerleri de keldi.
Tómenge túsken 20 jastaǵy jigit jarymen sózge kelgennen keıin ózine-ózi qol salýǵa bel býǵanyn aıtyp berdi. Ol ózin qutqaryp qalǵan polıtsııa qyzmetkerlerine alǵysyn jetkizdi.
