Oralda jańa teatr ashyldy
ASTANA. QazAqparat - Oralda Halyqaralyq teatr kúni jańa óner ujymy jumysyn bastady, dep habarlaıdy 24.kz telearnasy.
Teatrdyń rejısseri ári kórkemdik jetekshisi belgili akter - Erkin Tasbolat. «Uly dala» ataýyn ıelengen teatr keleshekte álemdik deńgeıdegi shyǵarmalardy sahnalaýdy maqsat etedi. Ázirge negizgi kórermeni - jetkinshekter.
Sondyqtan bolar, tusaýkeser qoıylym shymyldyǵy da «Saq bol» atty halyq ertegisimen túrildi. Sý jańa sahnanyń tyrnaqaldy týyndysyn kórermen jyly qabyldady. Bezendirilýi, dekoratsııa men akterlerdiń oınaý sheberligi de kópshilik kóńilinen shyqty.
«Óner salasynda oqyp júrgen 5 akterimiz bar, bir mýzykalyq operatorymyz bar, ázirge ujymymyz kishkentaı. Óıtkeni jańadan ashylyp jatqannan keıin oblys, respýblıka deńgeıinde qalyp qoımaı, bizdiń Qazaqstannyń týyn álemdik deńgeıde kóterip, ózge memleketke aparyp tanytqymyz keledi», deıdi teatr dırektory Aıjan Hamıdýllına.
