Oralda jańa «Semeı» kúzet kemesi sýǵa jiberildi
ORAL. KAZINFORM – Búgin Oral qalasynda Qazaqstannyń qorǵanys salasy úshin mańyzdy oqıǵa – «Semeı» kúzet kemesin iske qosý rásimi ótti. Bul – 1993 jyldan bastap «Qazaqstan ınjınırıng «Ulttyq kompanııasy» AQ quramyna kiretin «Zenıt «Oral zaýyty»AQ bazasynda salynǵan 36-shy keme.
Sý kóligi Jaıyq ózeniniń boıymen Kaspıı teńizine jóneltilip, onda memlekettik shekarany kúzetý men qorǵaý qyzmetin atqaratyn bolady. Keme zańsyz tasymaldaý, kontrabanda, zańsyz balyq aýlaý, shekarany zańsyz kesip ótý áreketteri jáne basqa da qylmystardyń qaýpin tez arada jolyn kesýge arnalǵan.
Bul is-sharanyń máni erekshe, sebebi Memleket basshysy Qasym-Jomart Toqaev 2025 jyldy Qazaqstanda Jumysshy mamandyqtar jyly dep jarııalaǵany onyń mańyzyn arttyra túsedi. Jańa kemeniń iske qosylýy – bilimi men sheberligi eldiń qorǵanys áleýetiniń negizi sanalatyn ınjenerlerdiń, dızaınerlerdiń, keme jasaýshylardyń jáne jumysshylardyń jumysynyń aıqyn nátıjesi.
Bul joba qaýipsizdikti qamtamasyz etýge qosqan úles qana emes, sonymen qatar memlekettiń damýyndaǵy jumysshy mamandyq ıeleriniń rólin moıyndaýdyń aıqyn úlgisine aınalmaq.
«Semeı» kemesi – otandyq mamandardyń kóp jylǵy eńbeginiń taǵy bir jemisi. 1941 jyly negizi qalanǵan Oraldaǵy «Zenıt» zaýyty elimizdiń qorǵanys ónerkásibi keshenindegi negizgi kásiporyndardyń biri ekeni belgili. Táýelsizdik alǵannan beri memlekettik qorǵanys tapsyrystaryn turaqty oryndap, joǵary tehnologııalyq qaıyqtar men «Suńqar», «Búrkit», «Barys» jáne t.b arnaıy maqsattaǵy kemelerdi shyǵaryp jatyr.
– Osy múmkindikti paıdalana otyryp, kemeni jobalaýǵa, qurastyrýǵa jáne jabdyqtaýǵa atsalysqan barlyq qyzmetkerge shyn júrekten alǵysymdy bildirgim keledi. Sizderdiń kásibı sheberlikterińizdiń, adal eńbekterińiz ben joǵary jaýapkershilikterińizdiń arqasynda búgin biz elimizdiń ıgiligine qyzmet etetin taǵy bir kemeni sýǵa jiberip otyrmyz, - dedi Batys Qazaqstan oblysynyń ákimi Narıman Tóreǵalıev.
«Zenıt Oral zaýyty» AQ Qazaqstannyń ulttyq qaýipsizdigin qamtamasyz etýge, memlekettiń qorǵanys qabiletin nyǵaıtýǵa jáne otandyq keme jasaýdy damytýǵa qoldaý kórsetýge eleýli úles qosýdy jalǵastyryp jatyr.
Aıta keteıik, Oralda karateden Mánshúk Mámetovany eske alýǵa arnalǵan halyqaralyq týrnır ótedi.