Oralda jańa qar tazalaǵysh mashına iske kiristi
ORAL. QazAqparat - Oral qalasynda búgin Fın elinde shyǵarylǵan jańa rotorly qar tazalaǵysh «Arctic Machine» tehnıkasy synaqtan ótkizildi, dep habarlaıdy QazAqparat tilshisi.
Oral qalalyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy Qaırat Muhambetqalıevtiń aıtýynsha, bıyl 19 arnaıy tehnıkany satyp alý úshin oblystyq bıýdjetten 307 mln. teńge bólingen. Sonyń ishinde atalmysh mashınanyń quny 41 mln. teńge turady. Munyń ereksheligi, bir ózi burynǵy tórt qar tazalaǵyshty aýystyra alady. Bul janar-jaǵar maımen qatar ýaqytty únemdeýge múmkindik beredi. Onyń jyldamdyǵy sondaı, alǵashqy kúnniń ózinde atalmysh tehnıka bes saǵattyń ishinde 1 myń tekshe metr qardy tıep úlgerdi. Ázirge osy bir tehnıka qys boıy baıqaýdan ótip shyǵady. Eger bári oıdaǵydaı bolsa, aldaǵy ýaqytta bul ónimdi mashınanyń qatary kóbeımekshi.
«Arctic Machine» kompanııasynyń ókili Stanıslav Peresvetovtiń sózine qaraǵanda, atalmysh mashına mınýtyna 30 tekshe metr qardy tıeıdi. Derbes qar tazalaǵyshtyń qýaty 175 attyń kúshine teń dızeldi qozǵaltqyshy bar. Janar-jaǵar maı tolyq quıylsa, 10-12 saǵatqa jetedi. Qar laqtyrýshy qurylǵysy da kez kelgen baǵytqa burylyp, jumys jasaı alady. Fınlıandııada qurastyrylǵan atalmysh tehnıka Reseıdiń Máskeý, Chelıabi, Novosibir qalalarynda qoldanylýda. Al Qazaqstanda alǵash ret Oralda synnan ótpekshi. Ol, ásirese, qar qalyń túsken ýaqytta óte qolaıly.
Q.Muhambetqalıevtiń málim etkenindeı, ótken jyly qaladan 350 myń tekshe metr qar shyǵarylǵan bolatyn. Osy qys ta qarly bolady delinýde. Kúni búgin shaharda qar tazalaýmen «Jaıyq taza qala» JShS-nyń 108 tehnıkasy aınalysýda.
