Oralda jańa formattaǵy tsıfrlyq keńse ashyldy
ORAL. KAZINFORM — Oral qalasynda jasandy ıntellekt tehnologııalaryna negizdelgen jańa formattaǵy tsıfrlyq keńse paıdalanýǵa berildi, dep habarlaıdy BQO ákiminiń baspasóz qyzmeti.
Zamanaýı ortalyq memlekettik qyzmetterdiń qoljetimdiligin arttyrýǵa, turǵyndardyń ýaqytyn únemdeýge jáne tsıfrlyq múmkindikterdi keńinen paıdalanýǵa baǵyttalǵan. Saltanatty sharaǵa oblys ákimi Narıman Tóreǵalıev, «Azamattarǵa arnalǵan úkimet» memlekettik korporatsııasy» KEAQ Basqarma tóraǵasy Arman Kenjeǵalıev qatysty.
Memleket basshysy Qasym-Jomart Toqaev «Jańa tarıhı kezeńdegi Qazaqstannyń ózekti mindetteri» atty Joldaýynda tsıfrlyq ekonomıkany qalyptastyrý jáne ozyq tehnologııalardy halyq ıgiligine paıdalaný mindetin aıqyndady. Prezıdent jarııalaǵan Tsıfrlandyrý jáne jasandy ıntellekt jyly aıasynda óńirde bul baǵyttaǵy jumystar júıeli jalǵasýda.
Jyl basynan beri oblysta 3 mıllıon 203 myńǵa jýyq memlekettik qyzmet kórsetilip, onyń 98 paıyzy elektrondy formatta júzege asyryldy. Al «Azamattarǵa arnalǵan úkimet» memlekettik korporatsııasynyń oblystyq fılıaly usynǵan 629 myńnan astam qyzmettiń 60 paıyzǵa jýyǵy onlaın kórsetildi.
Jańa keńse úsh negizgi fýnktsıonaldyq aımaqtan turady. Ekspress-aımaqta turǵyndar anyqtamalar men qarapaıym qyzmetterdi óz betinshe jedel ala alady. Tsıfrlyq aımaqta elektrondyq tsıfrlyq qoltańba rásimdeý, týý, neke qııý, turǵylyqty jeri boıynsha tirkelý jáne áleýmettik tólemderge qatysty qyzmetter onlaın usynylady. Saraptamalyq aımaqta mamandar kásibı kómek kórsetedi. Sondaı-aq azamattardyń tsıfrlyq saýattylyǵyn arttyrýǵa arnalǵan arnaıy oqý aımaǵy qarastyrylǵan.
— Tsıfrlandyrýdyń basty ólshemi — tehnologııanyń kúrdeliligi emes, onyń adam ómirine ákeletin naqty paıdasy. Jasandy ıntellekt jas ereksheligine, turǵylyqty jerine nemese tsıfrlyq daǵdylaryna qaramastan, ár azamatqa zamanaýı memlekettik qyzmetterdi erkin paıdalanýǵa jol ashady, — dedi Narıman Tóreǵalıev.
Óńirde tsıfrlyq ınfraqurylymdy jetildirý jáne memlekettik basqarýǵa ozyq tehnologııalardy engizý jumystary jalǵasady.
