Oralda «Jan shýaǵy» qaıyrymdylyq sharasy balalarǵa arnaldy

ORAL. QazAqparat - Búgin Dostyq úıinde Qazaqstan halqy BQO assambleıasynyń etnostar kúni aıasynda balalarǵa arnalǵan «Jan shýaǵy» qaıyrymdylyq sharasy ótkizildi, dep habarlaıdy «QazAqparat» HAA tilshisi.

Jańa jyl merekesine oraı «Masıs» armıan etnomádenı birlestigi uıymdastyrǵan sharaǵa Oral qalasyndaǵy zerde buzylystary bar balalarǵa arnalǵan oblystyq arnaıy mektep-ınternatynan 33, otbasylyq úlgidegi balalar aýylynan 15 bala qatysyp, olarǵa oıynshyqtar men tátti taǵam salynǵan syılyq qorjyny tabys etildi.

 

Atalmysh birlestik tóraǵasy, belgili kásipker, oblystyq máslıhat depýtaty Avetık Amırhanıan jınalǵandardy Táýelsizdiktiń 25 jyldyǵymen jáne Jańa jyl merekesimen quttyqtap, Elbasy muqtaj jandarǵa qolushyn sozýdy assambleıaǵa júktegenin, sondyqtan mundaı ıgi sharalardyń aldaǵy ýaqytta da jalǵasatynyn jetkizdi.

 

Budan keıin óńirge tanymal ónerpazdar balalarǵa arnap kontsert qoıdy. Ondaǵy týyndylar negizinen qazaq tilinde oryndalyp, jas jetkinshekterdi birlik pen yntymaqqa úndedi.

Aıta keteıik, etnomádenı birlestikter arnaıy mektepterde tárbıelenetin balalarǵa jyl boıy qaıyrymdylyq kómekterin kórsetip keledi.