Oralda jalǵyz baspanasy apatty dep tanylǵan saıajaı turǵyndaryna páter berile bastady
ORAL. KAZINFORM – Oral qalasynda jalǵyz baspanasy apatty dep tanylǵan saıajaı turǵyndaryna páter berile bastady.
Oral qalasy ákiminiń orynbasary Azamat Halelovtiń málim etkenindeı, keshe 5 turǵynǵa baspana kilti tabys etilse, búgin taǵy 9 adamǵa páter berilgen.
Azamat Erǵalıulynyń sózine qaraǵanda, saıajaılar sýǵa ketkennen beri eki aıdaı ýaqyt ótti. Qazirgi tańda saıajaılardyń 30 paıyzy áli sýda tur. Sondyqtan evakýatsııalyq pýnktterde turyp jatqan adamdar bar.
«Osy kezge deıin 10 492 saıajaı turǵynynan ótinim tústi. Sonyń ishinde 3 093-i olardyń jalǵyz baspanasy dep tanyldy. 1 500-ge jýyq úı tehnıkalyq tekserýden ótkizilip, sonyń ishinde 808-i turýǵa jaramsyz dep tanyldy. Prezıdent tapsyrmasyna sáıkes jalǵyz baspanasy apatty dep tanylǵan turǵyndarǵa iri kompanııalardyń esebinen jańadan salynyp jatqan úılerden páter satyp alynady. Onyń baǵasy 22 mln teńgeden aspaıdy. Sonymen qatar turǵyndar óziniń qalaýy boıynsha ekinshi naryqtaǵy páterlerge ıe bola alady. Birinshi kezekte jalǵyz baspanasy turýǵa jaramsyz turǵyndardyń máselesi sheshiledi», deıdi qala ákiminiń orynbasary.
Onyń aıtýynsha, kúni búginge deıin komıssııadan 825 materıal ótse, sonyń qorytyndysy boıynsha 17 úıdi jóndeý qajet dep tabyldy. Mundaı úılerdi jóndeý úshin orta eseppen 3-3,5 mln teńge qarastyrylady.
«Sonymen qatar 700-deı turǵynnyń qujaty rásimdelmegen bolyp shyqty, olar múshelik bıletteri boıynsha kommýnaldyq qyzmetter aqysyn tólep kelgen. Sol sekildi 100-den astam turǵynnyń jataqhanalarda 20-25 sharshy metr bólmesi bar. 700-den astam adamnyń basqa turǵylyqty mekenjaılarda úlesi bar bolyp shyqty. Oǵan qosa 300-ge jýyq turǵynnyń aýyldyq jerdegi apatty nemese qulatylǵan úıleri óziniń atynda tirkeýde qalyp qoıǵan. Mine, osynyń bári muqııat qaralyp, tıisti sheshim qabyldanatyn bolady. Jumystardyń basym bóligin oqý jyly bastalǵanǵa deıin aıaqtaý kózdelip otyr. Qazirgi tańda tehnıkalyq tekserý, múlikti baǵalaý jáne sý tasqyny zardaptaryn joıýǵa baılanysty basqa da is-sharalar táýlik boıy atqarylýda», dedi A.Halelov.
Eske sala keteıik, budan buryn Oral qalasynda 350-den astam saıajaı úıi turýǵa jaramsyz ekendigin jazǵan bolatynbyz.
