Oralda jalǵan sóz jetkizip, jurtqa jala japqan áıeldiń bas bostandyǵy shekteldi
ORAL. QazAqparat - Oral qalalyq sotynyń úkimimen L.Batkaeva QR QK 419-baby 3-bóligine (aýyr qalmystyń jasaǵany týraly adamdy aıyptap, kórineý jalǵan sóz jetkizý) sáıkes aıypty dep tanylyp, onyń úsh jylǵa bas bostandyǵy shektelip, probatsııalyq baqylaý ornatyldy.
Oral qalalyq sotynan túsken málimetke qaraǵanda, L.Batkaeva bıylǵy maýsym aıynyń aıaǵynda medıtsına mekemesinde bosanǵannan keıin sábıin meıirbıkeniń túsirip alǵany jóninde ishki ister organdaryna shaǵymdanǵan. Osy derek boıynsha QR QK 317-baby 3-bóligine sáıkes sotqa deıingi tergep-tekserý bastaldy. Biraz ýaqyt ótken soń Batkaeva aıtqandaryn ózgertip, D. degen azamattyń náresteni urlap ketkeni jóninde habarlaǵan. Osyǵan baılanysty qylmystyq is QR QK 125-baby 2-bóligi 5-tarmaǵyna (kámeletke tolmaǵan adamdy urlaý) aýystyrylǵan. Alaıda shilde aıynyń ortasynda sottalýshy óz aıtqandarynyń bári de jalǵan ekendigin málimdedi. Sóıtip ol ótirikti boratyp, jurtty bosqa dúrliktirip júrgen bolyp shyqty.
Tergeý barysynda qala prokýrory men sottalýshy arasynda kináni moıyndaý týraly protsessýaldyq kelisim jasaldy.
Sot úkimi zańdy kúshine engen joq.
