Oralda jalǵan nómirmen júrgen júrgizýshi 1,1 mln astam teńge aıyppul tólemegen
ORAL. KAZINFORM – Batys Qazaqstan oblysy aýmaǵynda ótkizilgen jedel-aldyn alý is-sharasy barysynda Oral qalasynyń patrýldik polıtsııa qyzmetkerleri Toyota Camry avtokóliginiń jalǵan memlekettik nómirmen júrgenin anyqtady.
BQO polıtsııa departamentiniń baspasóz qyzmetinen málim etkenindeı, atalǵan kólik Qazaqstan Respýblıkasynda tirkelgenine qaramastan, Reseı Federatsııasynyń memlekettik nómir belgisimen júrgen.
Tekserý barysynda atalǵan avtokólikke qatysty 47 tólenbegen aıyppul bary belgili boldy. Aıyppuldardyń jalpy somasy 1 mln 157 myń 972 teńgege jetken.
- Aldyn ala málimet boıynsha júrgizýshi ákimshilik jaýapkershilikten jaltarý maqsatynda sheteldik memlekettik nómir belgilerin paıdalanǵan. Atalǵan derek boıynsha qoldanystaǵy zańnamaǵa sáıkes tıisti sharalar qabyldandy. Avtokólik aıyp turaǵyna qoıyldy. Bul derek jol-kólik oqıǵalarynyń aldyn alý jáne júrgizýshiler tarapynan jasalatyn óreskel quqyq buzýshylyqtardy anyqtaý maqsatynda engizilgen «Qorǵaý» avtomattandyrylǵan júıesiniń kómegimen tirkeldi, - dep habarlady vedomstvodan.
Departament derekterine sáıkes 8-10 qańtar aralyǵynda respýblıka kóleminde ótkizilgen «Jalǵan nómir» jedel-aldyn alý is-sharasy barysynda Batys Qazaqstan oblysynda barlyǵy 484 ákimshilik quqyq buzýshylyq anyqtaldy. Sonyń ishinde 32-si kólik quralyn memlekettik tirkeý nómirinsiz basqarǵany úshin jaýapqa tartyldy. Ekeýi avtokólikti jalǵan nemese qoldan jasalǵan nómirmen júrgizgen. 15-i rýlge mas kúıinde otyrǵan.
Barlyǵy 33 avtokólik arnaıy aıypturaqqa qoıyldy.
Eske sala keteıik, budan buryn Oral qalasynda 4 avtokólik soqtyǵysyp, 5 adamnyń aýrýhanaǵa jetkizilgenin jazǵan edik.
