Oralda jalǵan dabyl kóterip, polıtsııa shaqyrý jıilep otyr
ORAL. QazAqparat - Oral qalasynda jalǵan dabyl kóterip, polıtsııa shaqyrý jıilep otyr, dep habarlaıdy «QazAqparat» tilshisi.
Oral qalalyq ishki ister basqarmasynyń baspasóz qyzmetkeri Gúlaman Ismaǵulovanyń aıtýynsha, jańa jyl bastalǵannan beri osyndaı eki derek tirkelgen.
5 qańtar kúni saǵat 13.02-de beıtanys áıel kezekshi bólimge telefon shalyp, 2006 jylǵy ulynyń tonalǵanyn habarlaıdy. Onyń sózine qaraǵanda, №8 mektep aıaldamasynda turǵan ulyna eki beıtanys jigit shabýyl jasap, qymbat «Aıfon-5S» telefonyn tartyp áketken. Tártip saqshylary istiń mánisin teksere kelgende, áıeldiń jalǵan telefon soqqany, eshkimniń tonalmaǵany, ulynyń telefondy ózi joǵaltyp alǵany anyqtaldy.
1983 jylǵy áıel «Balam telefonyn ózi joǵaltty desem, izdelmeı qalady, sosyn jalǵan aıttym», dep moıyndady. Polıtsııa qyzmetkerleri áıeldiń bul áreketine keshirimmen qarap, qylmystyq is qozǵaǵan joq. Degenmen oǵan QR Ákimshilik quqyqbuzýshylyq kodeksi 438-baby 1-bóligine sáıkes 30 AEK (72150 teńge) kóleminde aıyppul salynýy múmkin. Qazir is tergelýde.
Budan oqıǵadan keıin kóp uzamaı belgisiz er adam «102» operatoryna telefon soǵyp, I.Ların kóshesi boıynda tapa-tal túste birneshe adamnyń qaraqshylyq shabýyl jasap, iri kólemde aqshasyn kúshpen tartyp alyp ketkenin jetkizdi. Alaıda oqıǵa ornyna dereý jetken polıtsııa qyzmetkerleri iship alǵan azamatqa tap boldy. Ol keıin mundaı áreketke araqtyń býymen barǵandyǵyn aıtyp, óz kinásin moıyndady. 1977 jylǵy er adam Zelenov aýdany Trekın aýylynda turatyn bolyp shyqty, jumys jasaıdy. Onyń ústinen QR QK 419-baby 2-bóligine sáıkes (qylmys jasalǵany týraly kórineý jalǵan sóz jetkizý) qylmystyq is qozǵalyp, sotqa deıingi tergep-tekserýdiń biryńǵaı tizilimine engizildi. Qolynan eshqaıda ketpeıtini týraly qolhat alyndy. Endi oǵan úsh myń AEK kóleminde aıyppul salynýy nemese sol mólsherde túzeý jumystaryna jiberilýi, sondaı-aq úsh jylǵa deıingi merzimge bas bostandyǵynan shekteýge ne sol merzimge bas bostandyǵynan aıyrýǵa jazalanýy múmkin.
Aıta keteıik, ótken jyly qalada QR QK 419-babyna sáıkes 10, sonymen qatar QR Ákimshilik quqyqbuzýshylyq kodeksi 438-babyna sáıkes 30 derek tirkeldi.
