Oralda jaldamaly páter ıeleri 16,3 mln astam teńge qaryzdar bolyp otyr
ORAL. KAZINFORM — Oral qalasynyń memlekettik turǵyn úı qorynda jalǵa berilgen 1 429 páter bar.
Oral qalasy turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bóliminiń basshysy Asyljan Haırýllınniń málim etkenindeı, jaldamaly páter ıeleriniń bári birdeı kelisimshartqa sáıkes mindettemelerin oryndaı bermeıdi.
Bólim basshysynyń sózine qaraǵanda, 590 páter ıesiniń 3 aıdan astam qaryzy bar. Bul barlyq jaldamaly páterlerdiń 40 paıyzynan asady. Qazirgi kezde jalpy qaryz kólemi 16 mln 387,090 myń teńgege jetti.
— Aı saıyn jalǵa berilgen úıler qarjysyn jınaý jáne ony maqsatyna sáıkes paıdalaný boıynsha monıtorıng júrgiziledi. «Turǵyn úı qatynastary ortalyǵy» kommýnaldyq memlekettik mekemesiniń mamandary mekenjaılarǵa baryp, bereshekti óteý jóninde habarlama tabys etedi, — deıdi A.Haırýllın.
Onyń aıtýynsha, «Turǵyn úı qatynastary ortalyǵy» KMM birqatar shara qabyldady. Atap aıtqanda, M.Móńkeuly 85/6 jáne Qambar batyr kóshesi 6-úıde turatyn eki turǵyn sot sheshimimen jaldamaly páterinen shyǵaryldy. Sondaı-aq 11 jalǵa alýshyǵa resmı habarlama jiberildi. Sonyń ishinde 9-ynyń qaryzy 6 aıdan asqan. Bireýi ýaqytyly tólemeýmen birge turǵyn úıde turý erejesin únemi buzǵan. Taǵy bireýi ózi turýy tıisti páterdi basqa bireýge jalǵa berip, 6 aıdan astam ýaqyt boıy jalǵa alý aqysyn tólemegen.
Eske sala keteıik, budan buryn Oralda apatty úıi súrilgen turǵyndar nelikten baspana ala almaı otyrǵanyn jazǵan bolatynbyz.
