Oralda «Jaqsy sóz - jannyń tynysy» atty baıqaý márege jetti

  ORAL. QazAqparat - Ǵ.Qurmanǵalıev atyndaǵy oblystyq fılarmonııa zalynda mekemeler men kásiporyndar arasynda «Jaqsy sóz - jannyń tynysy» atty oblystyq sóz saıysy baıqaýy márege jetti, dep habarlaıdy «QazAqparat» tilshisi.

Memlekettik tildiń qoldanylý aıasyn keńeıtý, qoǵamnyń ár salasynda qyzmet etip júrgen tildi jetik biletin, qabiletti mamandardy yntalandyrý, rýhanı qundylyqtardy nasıhattaý maqsatynda BQO tilderdi damytý basqarmasy uıymdastyrǵan saıysqa barlyǵy segiz top qatysyp, baq synady.
 
 

Basqarma basshysy Aıgúl Myńbaevanyń aıtýynsha, baıqaý tórt baǵyt boıynsha toptyq túrde ótti. «Meniń Otanym - Qazaqstan» atty birinshi bólimde ár úmitker top ózin  jáne mekemesin tanystyryp, til bilý sheberligin kórsetti. «Memlekettik tildi bilý - paryzym» taqyrybynda qatysýshylar esse jazyp, onda Qazaqstandaǵy qazirgi saıası-áleýmettik máseleler, «Rýhanı jańǵyrý» baǵdarlamasy qamtyldy. «Ónerlige óris keń» bóliminde ár top óz ónerlerin (án, kúı, bı, kórkem sóz oqý) ortaǵa saldy. Al «Júırikten júırik ozar jarysqanda» bóliminde toptar bir-birimen pikir almasyp, suraqtarǵa jaýap berdi. «Bolashaqqa baǵdar: rýhanı jańǵyrý», «EKSPO-2017» - Qazaqstannyń ekonomıkalyq damý áleýetin jahanǵa tanytar joba», «Alash úkimetine 100 jyl» - táýelsizdiktiń rýhanı bastaýy» sekildi taqyryptar tóńireginde oı tolǵady.
 

 

Baıqaý qorytyndysynda oblystyq ishki ister departamentiniń «Parasatty polıtseı» komandasy bas júldeni jeńip aldy. Oblystyq klınıkalyq aýrýhananyń «Jan daýasy» birinshi, «Qazaqtelekom» AQ-nyń «Qazaqtili.com» toby ekinshi, BQO densaýlyq saqtaý basqarmasynyń «Densaýlyǵy» úshinshi orynǵa ıe boldy.