Oralda jábirlenýshilerge 8,6 mln teńge zalal keltirgen jalǵan jıhaz jasaýshy sottaldy

ORAL. KAZINFORM – Oral qalasynda birneshe adamdy aldap, alaıaqtyq jasaǵan turǵyn 3 jyl 6 aıǵa bas bostandyǵynan aıyryldy. 

BQO prokýratýrasynyń baspasóz qyzmetinen málim etkenindeı, qala turǵyny jeke kásipkerlik ashyp, jıhaz shyǵaramyn degen jeleýmen tseh ǵımaratyn jalǵa alyp, sóıtip qylmystyq áreketterin jasyrǵan. 

Áleýmettik jelilerde, sondaı-aq ártúrli ınternet-jarnama platformalarynda jıhaz jasaýdy usynatyn aqparatty ornalastyrǵan. Sodan keıin ózin kásipkerlik qyzmetti atqaratyn adam retinde kórsetip, tutynýshylardyń úıine kelip, qajetti ólshemderdi jasap, keıinnen tapsyrystyń oryndalatynyn aıtyp sendirgen.

«Jalǵan jıhaz jasaýshy azamattarǵa jıhazdyń qosalqy zattarynyń fotosýretterin jibergen, sonymen qatar materıaldy satyp alý úshin basqa adamdarmen kelisimder bar dep sendirgen. Osylaısha jábirlenýshilerdi aldaǵan. Sonyń saldarynan 7 jábirlenýshige 8 mln 633 myń teńge kóleminde materıaldyq shyǵyn keltirilgen. Sotta sottalýshy jábirlenýshilermen azamattyq-quqyqtyq qarym-qatynastyń bar ekenin alǵa tartyp, kinásin moıyndamady. Alaıda memlekettik aıyptaýshy sottalýshynyń kinásin tolyq dáleldedi. Sóıtip ol eki nemese odan da kóp adamǵa qatysty iri kólemde alaıaqtyq jasaǵany úshin 3 jyl 6 aıǵa bas bostandyǵynan aıyryldy», - dep habarlady vedomstvodan.

Eske sala keteıik, budan buryn alıment tólemegen BQO turǵyny sottalǵanyn jazǵan bolatynbyz.