Oralda jábirlenýshilerge 5 mln teńge zalal keltirgen alaıaq ustaldy

ORAL. KAZINFORM – Oral qalasynda alaıaqtyq jasady degen kúdikpen 26 jastaǵy áıel adam ustaldy.

BQO polıtsııa departamentiniń baspasóz qyzmetinen málim etkenindeı, kúdikti jıhaz salondarynyń birinde menedjer bolyp jumys istegen. Klıentterden jıhaz satyp alý syltaýymen olardyń aqshasyn óz jeke shotyna aýdartyp, qolma-qol tólengen somalardy ózine alǵan. 

- Aldyn ala júrgizilgen zertteýlerge sáıkes, onyń osy áreketteriniń saldarynan turǵyndarǵa shamamen 5 mln teńge shyǵyn keltirilgen. Qazirgi ýaqytta kúdiktige qatysty 13 epızod boıynsha QR QK 190-baby 3-bóligine (alaıaqtyq) sáıkes sotqa deıingi tergeý amaldary júrgizilip jatyr.

Polıtsııa qyzmetkerleri osy alaıaqtyń qurbany bolǵan azamattardy 102 nómirine nemese ózderiniń turǵylyqty jeri boıynsha aýmaqtyq polıtsııa bólimine habarlasýǵa shaqyrady.

Polıtsııa azamattarǵa satyp alý kezinde asa saq bolýǵa, satýshylar men uıymdardyń senimdiligin muqııat tekserýge keńes beredi, - dep habarlady vedomstvodan.

Atalǵan bap boıynsha aıypty dep tanylǵan adam múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan alty jylǵa deıingi merzimge aıyra otyryp nemese onsyz, úsh jyldan jeti jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.

Eske sala keteıik, budan buryn BQO-da alımentten jaltarǵan qos azamattyǵy bar er adamǵa jarty mln teńge aıyppul salynǵanyn jazǵan bolatynbyz.