Oralda jábirlenýshilerge 158 mln teńge zalal keltirgen alaıaq áıel sottaldy
ORAL. KAZINFORM — Oral qalalyq sotynda QR QK 190-baby 4-bóligi 2-tarmaǵyna sáıkes aıyptalǵan áıelge qatysty úkim shyqty.
BQO sotynyń baspasóz qyzmetinen málim etkenindeı, 2024–2025 jyldar aralyǵynda áıel ártúrli bankterdiń («Home Credit Bank» AQ, «BankTsentrKredıt» AQ jáne basqa) qyzmetkeri retinde tanystyryp, azamattardyń senimine kirgen.
Ipotekalyq zaemdardy rásimdeýge, jeńildikpen baspana satyp alýǵa kómektesý, avtobıznes jáne óziniń jeke kásipkerligine joǵary protsenttik paıda beremin degen ýádemen ınvestıtsııa tartý syltaýymen ol jábirlenýshilerden aqsha qarajatyn alyp otyrǵan.
Alǵashqy kezeńde tabysty qyzmettiń kórinisin jasaý úshin sottalýshy jańa qatysýshylardyń qarajatyn tartý esebinen bastapqy somalardy paıyzymen bólip tólep, keıinnen iri somalardy ıemdenip ketken. Jalpy alǵanda, is boıynsha qylmystyq qyzmettiń 26 epızody anyqtaldy. Zalal somasy 158 mıllıon teńgeden asty.
Sot otyrysynda sottalýshy kinásin tolyq moıyndap, aıyptaýda kórsetilgen mán-jaılardy rastady jáne ókinetinin bildirdi.
Sot úkimimen alaıaq QK-niń 190-baby 4-bóliginiń 2-tarmaǵy boıynsha kináli dep tanylyp, oǵan 6 jyl 8 aı merzimge bas bostandyǵynan aıyrý jazasyn qaýipsizdigi ortasha qylmystyq-atqarý júıesi mekemesinde óteýge kesildi. QR QK-niń 74-babynyń 1-bóligi negizinde, sottalǵan adamnyń 14 jasqa tolmaǵan balasynyń bolýyna baılanysty bas bostandyǵynan aıyrý túrindegi jazany óteý 4 jylǵa keıinge qaldyryldy.
Buryn tańdalǵan kúzetpen ustaý túrindegi bultartpaý sharasynyń kúshi joıylyp, sottalǵan adam sot zalynan dereý kúzetten bosatyldy. Onyń minez-qulqyn baqylaý Oral qalalyq probatsııa qyzmetine júkteldi.
Jábirlenýshilerdiń basym bóliginiń materıaldyq zalaldy óteý týraly talap qoıý aryzdary 100 mıllıon teńgeden astam somaǵa tolyq kólemde nemese ishinara qanaǵattandyryldy.
Eki jábirlenýshiniń azamattyq talap qoıýlary zalaldyń óz erkimen tolyq ótelýine baılanysty qaraýsyz qaldyryldy. Moraldyq zııandy óteý týraly talaptar qanaǵattandyrylmady.
Úkim zańdy kúshine engen joq.
Eske sala keteıik, budan buryn Oralda óz kompanııasynan 2,2 mln AQSh dollaryn jymqyrǵan kásipker sottalǵanyn jazǵan edik.
