Oralda jabaıy elik aýla qorshaýyna qystyrylyp qalǵan
ORAL. QazAqparat – Oralǵa jabaıy elik kirip, aýla qorshaýyna qystyrylyp qalǵan, dep habarlaıdy QazAqparat tilshisi.
BQO TJ departamenti baspasóz qyzmetiniń málim etkenindeı, oqıǵa 9 shilde kúni Máskeý kóshesi boıynda ornalasqan N.Nazarbaev zııatkerlik mektebi aýdanynda boldy.
Saǵat 10.14-te jergilikti turǵyndar aýla qorshaýyna jabaıy eliktiń qystyrylyp qalǵanyn, ony bosatyp jiberý kerektigin habarlaǵan.
Oqıǵa ornyna shuǵyl jetken jedel qutqarý jasaǵynyń qyzmetkerleri (4 adam, 1 tehnıka) qorshaýǵa qysylyp qalǵan elikti bosatyp, alǵan jaraqatyn tańyp, ony Trekın kenti mańyndaǵy ormanǵa qaraı jiberdi. Jumys saǵat 11.15-te tolyqtaı aıaqtaldy.
Turǵyndar sózine qaraǵanda, elik qalaǵa adasyp kirip ketken bolýy kerek.
Eske sala keteıik, Oralda ortalyq alańnyń birine qabannyń kirip ketkenin jazǵan bolatynbyz.
