Oralda ÓzgeEpic kreatıv haby ashyldy
ORAL. KAZINFORM – Búgin Oral qalasynda elimizdegi kreatıv ındýstrııany damytýdaǵy mańyzdy qadam – ÓzgeEpic kreatıv habynyń resmı ashylýy ótti.
Kreatıv hab — zamanaýı óner men mádenı tendentsııalardy, tsıfrlyq óner men jańa tehnologııalardy toǵystyratyn alań. ÓzgeEpic haby osy baǵytta ınnovatsııalyq jobalardy júzege asyryp, jastardyń shyǵarmashylyq bastamalaryn damytýǵa úles qosyp keledi. 2019 jyly Almaty qalasynda bastaý alǵan joba, Túrkistan jáne Astana qalalarynda jalǵasyn taýyp, tabysty tájirıbeden keıin bıyl Oral qalasynda ashylyp otyr.
Memleket basshysy Qasym-Jomart Toqaev «Daryndy azamattardy ózine tartatyn oryndar, ıaǵnı kreatıvti ındýstrııa ortalyqtary barlyq oblys ortalyǵynda bolýǵa tıis» dep naqty mindetter qoıǵany belgili. Osy baǵytta Mádenıet jáne aqparat mınıstrligi jáne Batys Qazaqstan oblysynyń ákimdigi bastamasymen, «Samuryq-Qazyna» qoldaýymen jáne «Qarashyǵanaq Petroleým Opereıtıng B.V.» kompanııalarynyń áleýmettik ınvestıtsııalary negizinde ÓzgeEpic Oral kreatıv haby ashyldy.
— Kreatıvti ındýstrııany damytý — memleket saıasatynyń basym baǵyttarynyń biri, bul sala Memleket basshysynyń nazarynda. ÓzgeEpic Oral ortalyǵy jas talanttar úshin jańa múmkindikter alańyna, shabyt uıasyna aınalady dep senemiz, — dedi Batys Qazaqstan oblysynyń ákimi Narıman Tóreǵalıev.
ÓzgeEpic Oral kreatıv habynyń ashylýy óńirdegi mádenı jáne ıntellektýaldyq áleýetti arttyrýǵa zor úles qospaq. Jańa keńistikte mádenıet pen tehnologııa salasyndaǵy ártúrli qyzmet baǵyttary bir alańda toǵysady.
— Búgin daryndy jastar men shyǵarmashylyq salanyń azamattary úshin mańyzdy kún. Sebebi, halyqqa qajetti, suranystaǵy túrli kontent daıyndaıtyn, ári kreatıvti mamandardyń kásibı ortasyn qalyptastyratyn orta paıda boldy. Oraldaǵy ortalyq — «Samuryq-Qazyna» qorynyń elimiz boıynsha ashqan úshinshi kreatıvti haby. Osyǵan deıin Aqtóbe jáne Petropavlda paıdalanýǵa berildi. Jalpy Batys Qazaqstanda sońǵy tórt jylda 1,5 mlrd teńge bolatyn 16 áleýmettik joba jasadyq. Solardyń biri jyl saıyn 700 erekshe bala kómek alatyn «Qamqorlyq» ońaltý ortalyqtary. Qazirgi tańda tasqyn saldarynan zardap shekken Jańaómir aýylynda kópfýnktsıonaldy sport keshenin salý josparlanǵan. Bul da Qor kompanııalar tobynyń óńirlerdiń ınfraqurylymyn damytýǵa, halyqty áleýmettik qoldaýǵa jasap jatqan qadamynyń biri, — dedi «Samuryq-Qazyna» AQ korporatıvtik basqarý, áleýmettik-eńbek qatynastary jáne eńbekti qorǵaý jónindegi basqarýshy dırektor Ǵıbrat Aýǵanov.
Kreatıv habtyń ekojúıesinde kontsert alańy, teatr, kınozal, kitaphana jáne ashana ornalasyp, óner men bilimniń jańa múmkindikterin usynady. Sonymen qatar, galereıa, dárishana, kovorkıng keńistigi, óndiristik jáne medıa tsehtar — foto, podkast jáne dybys jazý stýdııalary, túsirilim alańdary jumys isteıdi. Aıta keterligi, kreatıv habta óńirlik anımatsııalyq stýdııa jumysyn bastap, mýltıplıkatsııa mamandary daıarlanady. Bul — aımaqtaǵy anımatsııa baǵytyndaǵy alǵashqy kásibı stýdııa bolmaq.
— Ár óńirde kreatıv salanyń damýyna yqpal etetin keńistikterdi qurǵanda ol jergilikti jerdiń, sol aımaqtyń mádenı-áleýmettik ereksheligine negizdelýi tıis. Osyny eskere otyryp, tıisti zertteýlerden keıin habtarymyzdy ashtyq. Oral qalasyndaǵy ashylǵan kreatıv keńistik óńirlerdiń zııatkerlik áleýetin óz deńgeıinde kórsetetin, aımaqtardyń múmkindigin ortalyqpen teńestiretin, kreatıv ındýstrııany damytýdaǵy óńirlerdiń rólin aıqyndaıtyn biregeı alań bolady degen oıymyz bar, — dedi ÓzgeEpic negizin qalaýshylar Maqpal Jumabaı jáne Toǵjan Qurmanjanqyzy.
Kadrlardy júıeli daıarlaý jáne kreatıvti ındýstrııalarda bilim berý baǵdarlamalaryn damytý — Qazaqstan úshin strategııalyq qajettilik. Osy oraıda habta suranysqa ıe mamandyqtar boıynsha oqý baǵdarlamasy túzilip, 200 kreatıv maman daıyndalady. Bul aımaqta jańa jumys oryndaryn quryp qana qoımaı, aımaqtyq shyǵarmashylyq ekonomıkanyń básekege qabilettiginiń artýyna yqpal etedi.