Oralda zańsyz ǵımarat salǵan turǵyn jaýapqa tartyldy
ORAL. KAZINFORM — Oral qalasynyń mamandandyrylǵan ákimshilik quqyq buzýshylyqtar jónindegi mamandandyrylǵan sotynda azamat S-ǵa qatysty QR Ákimshilik quqyq buzýshylyq týraly kodeksiniń 319-babynyń 1-bóligine sáıkes iske núkte qoıyldy.
BQO sotynyń baspasóz qyzmetinen málim etkenindeı, atalǵan azamat eki qabatty ǵımarattyń qurylysyn bastaý úshin bekitilgen jobany usynǵan.
Bul joba eki jeke turǵyn úı salýdy, árqaısysynyń jeke kireberisteri, baspaldaqtary jáne jertóleleri bolýyn kózdegen edi. Alaıda memlekettik sáýlet-qurylys baqylaý basqarmasy júrgizgen tekserý barysynda jobada jáne naqty nysanda eleýli aıyrmashylyqtar bar ekeni anyqtaldy.
Atap aıtqanda, ǵımarattyń naqty kólemi jobada kórsetilgen 14,40×13,50 metrdiń ornyna 25×20 metr bolǵan. Eki jeke úıdiń ornyna ortaq kireberis, bir baspaldaq jáne ortaq jertólesi bar bir ǵımarat salynǵan. Sondaı-aq eki úıdi bólip turatyn qabyrǵa qarastyrylmaǵan, sóıtip jobalyq talaptar buzylǵan.
Bul sáıkessizdikter baqylaýshy organdarǵa ǵımarattyń kommertsııalyq maqsatqa arnalǵany týraly qorytyndy jasaýǵa negiz berdi. Biraq jer ýchaskesiniń memlekettik aktisine sáıkes onyń maqsaty – jeke turǵyn úı salý.
«Azamat S. jobadaǵy ózgeristerdi jasaýǵa májbúr bolǵanyn aıtyp, úlken otbasy úshin úı salǵysy kelgenin túsindirdi. Onyń aıtýynsha, jańa joba maquldaýǵa usynylǵan, biraq qabyldanbaǵan. Arhıtektýra bólimi mamandary jobanyń zańnama talaptaryna qaıshy ekenin atap ótti. Budan bólek, qurylys barysynda órt qaýipsizdigi, avarııalyq shyǵý joldary jáne basqa da ınjenerlik talaptar eskerilmegen. Inspektorlardyń aıtýynsha, qurylysty aıaqtamas buryn ǵımaratty zańdastyrý qajet, alaıda bul úshin jobany tolyǵymen qaıta qaraý kerek, al qazirgi jaǵdaıda bul múmkin emes. Sot azamat S-ny kináli dep tanyp, oǵan 55 380 teńge mólsherinde aıyppul salý týraly sheshim shyǵardy. Sonymen qatar sot zańsyz salynǵan ǵımaratty buzýdy mindettedi», - dep habarlady vedomstvodan.
Eske sala keteıik, budan buryn BQO-da 75 mln teńge para alǵan salyq qyzmetkeri sottalǵanyn jazǵan bolatynbyz.