Oralda iz-túzsiz joǵalyp ketken eki jasóspirim tabyldy
ORAL. KAZINFORM - Batys Qazaqstan oblysy polıtsııa departamentiniń krımınaldyq polıtsııa qyzmetkerleri Oralda joǵalyp ketken eki jasóspirimdi aman-esen tapty.
BQO polıtsııa departamentiniń baspasóz qyzmetinen málim etkenindeı, Artem Sarmanov 24 aqpanda kámeletke tolmaǵandardy beıimdeý ortalyǵynan mektepke ketkennen oralmaǵan.
Polıtsııa qyzmetkerleriniń izdestirý is-sharalary nátıjesinde jasóspirim Oraldan tabyldy.
Óziniń aıtýynsha, ol osy ýaqyt boıy dostarynda bolǵan.
Ekinshi jasóspirim Zarına Nıǵmetova úıinen 16 naýryzda shyǵyp ketken. Polıtsııa qyzmetkerleri onyń júrgen jerin anyqtap, Aqtóbe qalasynan tapty.
- Atalǵan jasóspirimder buǵan deıin de birneshe ret úıinen ketken. Polıtsııa qyzmetkerleri olardy taýyp, qaıtaryp otyrǵan. Qazirgi ýaqytta ekeýiniń jaǵdaıy jaqsy, zańdy ókilderine tapsyrylatyn bolady, - dep habarlady vedomstvodan.
Eske sala keteıik, budan buryn BQO-da tóbeles kezinde 30 jastaǵy jigittiń kóz jumǵanyn jazǵan bolatynbyz.