Oralda volonterler kóp balaly analarǵa maska men antıseptıkter taratty
Koronavırýstyń aldyn alý sharalaryna batysqazaqstandyq erikti jastar da belsendi qatysýda.
Oral qalalyq jastar resýrstyq ortalyǵy jastar bastamalaryn qoldaý bóliminiń basshysy Dýlat Júsipqalıevtiń aıtýynsha, «Tuǵyrym» qoǵamdyq birlestiginiń músheleri (basym kópshiligi – kóp balaly analar) bir kúnniń ishinde 350 medıtsınalyq maskany qoldan tigip, «Oral jastary» volonterlik qozǵalysymen birge «Shańyraq» jasóspirim úıiniń turǵyndaryna úlestirdi. «Shańyraqta» negizinen jastaıynan jetim ósip, ata-ana qamqorlyǵynsyz qalǵandar turady.
«Munda kóp balaly otbasylar da turady. Solardyń atynan rızashylyǵymyzdy bildiremiz. Osylaısha halyq syn saǵatta da birge ekenin kórsetip jatyr. Aldaǵy ýaqytta birlesip jumys jasaýǵa daıynbyz», dedi «Shańyraq» jasóspirimder úıiniń komendanty Qarlyǵa Jarmuhambetova.
Sonymen qatar erikti jastar qaladaǵy kóp balaly, kirisi az otbasylarǵa da maskalar men antıseptıkti taratyp berdi.
Eske sala keteıik, budan buryn Oralda aptasyna 100 myń maska shyǵarý josparlanyp otyrǵanyn jazǵan bolatynbyz.
