Oralda voleıboldan jasóspirimder arasynda el chempıonaty márege jetti
ORAL. QazAqparat – Oralda voleıboldan 2003-2004 jylǵy jasóspirim qyzdar jáne 2005-2006 jylǵy uldar arasynda QR qysqy chempıonaty márege jetti, dep habarlaıdy QazAqparat tilshisi.
Týrnır voleıbol sportyn odan ári damytý jáne myqty jasóspirimderdi ulttyq quramaǵa irikteý maqsatynda uıymdastyryldy.
Jarysqa Nur-Sultan, Shymkent qalalary, Almaty, Aqtóbe, Atyraý, Jambyl, Qaraǵandy, Qostanaı, Qyzylorda, Pavlodar, Túrkistan, Shyǵys Qazaqstan jáne Batys Qazaqstan oblystarynyń komandalary qatysyp, baq synady. Oralǵa barlyǵy 300-deı jasóspirim voleıbolshylar jınaldy.
Chempıonat qorytyndysynda qyzdar arasynda «Qostanaı» komandasy jeńimpaz atandy. «Jetisý» men «Ekibastuz» ekinshi-úshinshi oryndardy bólisti. «Ekibastuzben» tartysty kezdesýde 2:3 esebimen utylǵan oraldyqtar tórtinshi oryndy qanaǵat tutty.
Uldar arasynda qyzylordalyqtar chempıondyq ataqty jeńip aldy. Jambyl ekinshi, Almaty oblysy úshinshi orynǵa ıe boldy. Sondaı-aq úzdik oıynshylar da marapattaldy.
