Oralda velosporttan jasóspirimder arasynda el birinshiligi márege jetti
ORAL. QazAqparat - Oral qalasynda jasóspirimder arasynda velosporttan el birinshiligi márege jetti, dep habarlaıdy «QazAqparat» tilshisi.
Velosporttan BQO quramasynyń aǵa bapkeri Beıbit Ibatovtyń sózine qaraǵanda, 15-16 jastaǵylar arasynda krıterıým saıysynan 23,5 km qashyqtyqta Jambyl oblysynan kelgen Roman Drojının jeńimpaz atansa, astanalyq Vladıslav Eıhorn ekinshi, oraldyq Dmıtrıı Noskov úshinshi satyǵa kóterildi. 13-14 jastaǵylardan krıterıýmnan (15,5 km) Almaty oblysynyń ókili Andreı Remhe, astanalyq Egor Strelnıkov jáne qyzylordalyq Aıan Shektibaev alǵashqy úsh orynǵa ıe boldy. Qyzdardan krıterıýmnan 15-16 jastaǵylardan (15 km) Almaty oblysynyń sportshylary Aqpeıil Ósim men Krıstına Tıtovskaıa altyn jáne qola júldeni jeńip alsa, jambyldyq Mılana Chıcheva kúmis medaldi enshiledi. 13-14 jastaǵylardan (13 km) Almaty oblysynyń taǵy bir ókili Bota Batyrbekova, shyǵysqazaqstandyq Darıa Tıýlkına, astanalyq Lıýbov Repp júldege ilikti. Toptyq básekede 13-14 jastaǵylar arasynda 50 km qashyqtyqta jambyldyq Rýslan Alıev máre syzyǵyn birinshi bolyp qısa, almatylyq A.Remhe men soltústikqazaqstandyq Konstantın Degtıarenko ekinshi, úshinshi bolyp jetti. Osy jastaǵy qyzdar arasynda (37 km) almatylyq B.Batyrbekova taǵy top jarsa, shyǵysqazaqstandyqtar D.Tıýlkına men Elena Mandrakova kúmis pen qolany qanaǵat tutty.
Osylaısha, chempıonattyń sońǵy kúnderi tabysty óner kórsetip, astanalyqtardy basyp ozǵan Almaty oblysynyń komandasy 5 altyn, 5 kúmis, 4 qola medalmen jalpy esepte birinshi orynǵa ıe boldy. Astanalyqtar 4 altyn, 5 kúmis, 2 qolamen ekinshi satyǵa jaıǵassa, Jambyl oblysynyń quramasy (2 altyn, 1 kúmis, 2 qola) úzdik úshtikti túıindedi. Aqmola oblysy (2 altyn, 1 qola) tórtinshi, BQO quramasy (1 altyn, 1 kúmis, 3 qola) besinshi orynǵa taban tiredi.
Aıta keteıik, birinshilik qorytyndysyna sáıkes aldaǵy jarystarda el namysyn qorǵaıtyn Qazaqstan quramasy jasaqtalatyn bolady.
