03:04, 06 Sáýir 2025 | GMT +5
Oralda vagondar jóndeletin ǵımarat órtendi
ORAL. KAZINFORM — Oral qalasynda temir jol stantsııasy aýmaǵynda ornalasqan ǵımarattyń (angar) shatyry otqa orandy.
BQO TJ departamentiniń baspasóz qyzmetinen málim etkenindeı, oqıǵa 5 sáýir kúni túski saǵat 13.21-de boldy.
— Aýmaǵy 150 metrdi qamtyǵan «tilsiz jaý» saǵat 14.23-te oqshaýlanyp, 14.43-te joıyldy. Zardap shekkender joq. Angar ishinde vagondar bolǵan. Órt sóndirýshilerdiń úılesimdi jáne kásibı saýatty is-qımyly nátıjesinde jalyn taralmaı, vagondarǵa tıgen joq. Aldyn ala boljam boıynsha ot órt qaýipsizdigi erejelerin saqtamaýdan shyqqan. Qazirgi kezde oqıǵanyń mán-jaıy anyqtalyp jatyr, — dep habarlady vedomstvodan.
Eske sala keteıik, budan buryn BQO-da bıyl 3 aıda 135 órt oqıǵasy tirkelgenin jazǵan bolatynbyz.