Oralda úzdik boksshylar men bapkerlerge páter kilti tabys etildi
ORAL. KAZINFORM – Oral qalasynda úzdik boksshylar men bapkerlerge qurmet kórsetildi.
BQO boks federatsııasynyń prezıdenti Baýyrjan Kárimovtiń málim etkenindeı, halyqaralyq jarystarda el namysyn abyroımen qorǵap júrgen sportshylar qandaı qurmetke de laıyq.
Saltanatty jıyn barysynda belgili bapker Qýanysh Ýahasov «QR boksyn damytýǵa sińirgen eńbegi úshin» tósbelgisimen marapattaldy.
Azııa birinshiliginiń kúmis júldegeri Danııal Sábıt, jastar arasynda álem chempıony Óner Seıilhan, onyń jeke bapkeri Berik Jarylqasyn jáne bokstan BQO quramasynyń aǵa jattyqtyrýshysy Sattar Sultanǵalıǵa páter kilti tabys etildi.
Sonymen qatar klýb basshylary men 35 úzdik boksshyǵa arnaıy sporttyq kıimder tapsyryldy.
Jýyrda ǵana Nıderlandtyń Eındhoven qalasynda ótken Eindhoven Cup halyqaralyq týrnırinen 50 kelige deıingi salmaqta jeńimpaz atanyp oralǵan Danııal Sábıt rızashylyǵyn jetkizdi.
- Bizge osylaısha qoldaý kórsetken Batys Qazaqstan oblystyq boks federatsııasy, «Aqjaıyq» sport klýbynyń basshylyǵyna, barlyq aǵalarǵa alǵysymyzdy aıtamyz. Páter – úlken syılyq. Batys Qazaqstanda jas boksshylarymyz da tabysqa jetip keledi, - dedi D.Sábıt.
Eske sala keteıik, budan buryn Óner Seıilhannyń olımp shyńyna kóterilip, kók týdy bıikte jelbiretkisi keletini týraly aıtqanyn jazǵan bolatynbyz.
Qazir Óner Seıilhan oqý-jattyǵý jıynynda júr. Onyń ornyna páter kiltin anasy aldy.