Oralda úzdik túlekterge qurmet kórsetildi

Olardy quttyqtaǵan oblys ákimi Nurlan Noǵaevtyń atap ótkenindeı, eldiń bolashaǵy jas urpaqtyń bilimimen ólshenetini búgingi tańda aqıqatqa aınalyp otyr. Bıyl Ulttyq biryńǵaı testileýge oblystaǵy 4735 mektep bitirýshiniń 3307-si qatysty. UBT qorytyndysy boıynsha ortasha jınaq ball 81,25-ti qurady. 112 túlek «Altyn belgi», 37 túlek «Úzdik attestat» ıegeri atandy. Bul - túlekterdiń, olardyń ata-analary men ustazdarynyń qajyrly eńbeginiń nátıjesi.

Óńir basshysy UBT-da oblys boıynsha eń joǵary kórsetkish - 123 ball jınaǵan «Altyn belgi» ıegerleri - Bórli aýdanynyń ortalyǵy Aqsaı qalasyndaǵy №4 mekteptiń túlegi Aqmaral Mındeeva men Terekti aýdanyndaǵy «Úmit» tilder gımnazııasynyń túlegi Nurlan Azamatovqa noýtbýk tabys etti. Sondaı-aq Nurlan Asqaruly óz sózinde UBT nátıjesi boıynsha respýblıkanyń úzdik mektepteri anyqtalǵanyn, keń baıtaq Qazaqstan boıynsha birinshi jáne ekinshi oryndy BQO-nyń eki mektebi ıelengenin aıtyp ótti. Sol eki bilim oshaǵy - Batys Qazaqstan oblystyq daryndy balalarǵa arnalǵan mamandandyrylǵan mektep-ınternat pen daryndy balalarǵa arnalǵan mamandandyrylǵan S. Seıfýllın atyndaǵy №11 oblystyq qazaq mektep-ınternat kesheni dırektorlaryn ortaǵa shaqyryp, qurmet kórsetti. Ortaǵa shaqyrylǵan 70 «Altyn belgi» ıegerine tósbelgilerin tabystady.

Saltanatty jıynda alań tórine úzdik attestatqa ıe bolǵan túlekter, halyqaralyq olımpıadalar men ǵylymı jobalardyń, sporttyq dodalar men shyǵarmashylyq baıqaýlardyń jeńimpazdary shaqyryldy. Sahnaǵa kóterilgen mektep dırektorlary túlekterine aq jol tilep, izgi nıetterin joldady. Ónerimen elge tanylyp úlgergen mektep oqýshylary án-kúıimen kesh kórigin qyzdyrdy.

Quttyqtaýlar legi tolastaı kele, altyn uıalarynan asqaq armandaryna qanat qaqqaly turǵan balaýsa boıjetkender men bozbalalar boı men oı jarystyryp, syrlasyp ósken synyptastarymen shyr aınala vals bıledi. Osy sát janarǵa jas úıirip, kóńildi qımastyq kernep, túlekter úshin sońǵy ret syńǵyrlaı qońyraý soǵyldy. Shara sońy otshashýǵa ulasty.