Oralda úzdik ormanshylar marapattaldy
ORAL. QazAqparat - BQO tabıǵı resýrstar jáne tabıǵat paıdalanýdy retteý basqarmasynda QR Táýelsizdiginiń 25 jyldyǵyna oraı úzdik ormanshylar QR Aýyl sharýashylyǵy mınıstrligi Orman sharýashylyǵy jáne janýarlar dúnıesi komıtetiniń «Qazaqstan ormanyn qorǵaýdaǵy minsiz qyzmeti úshin» tósbelgilerimen marapattaldy, dep habarlaıdy «QazAqparat» HAA tilshisi.
Saltanatty sharaǵa qatysqan oblys ákiminiń birinshi orynbasary Arman Óteǵulovtyń atap ótkenindeı, elimizdegi orman qoryn kóbeıtip, ony bolashaq urpaq úshin saqtaýdyń mańyzy zor. Osy oraıda orman sharýashylyǵy salasyna memleket pen oblys ákimdigi tarapynan tıisti qoldaý kórsetilip keledi. Ásirese, orman sharýashylyǵy mekemeleriniń materıaldyq-tehnıkalyq bazasyn jaqsartýǵa, jańa tehnıkalarmen qamtýǵa basa kóńil bólinýde.
Jıyn barysynda Orda orman jáne janýarlar dúnıesin qorǵaý jónindegi memlekettik mekemesiniń dırektory Talǵat Samatov, Taıpaq orman sharýashyǵy mekemesiniń ormanshysy Serik Jumaǵalıev, Chapaev orman sharýashylyǵy mekemesiniń orman kúzetshisi Abat Ibatov, Bórli orman sharýashylyǵy mekemesi orman tuqymbaǵynyń ormanshysy Vıktor Glýhovke birinshi, taǵy birqataryna ekinshi jáne úshinshi dárejeli «Qazaqstan ormanyn qorǵaýdaǵy minsiz qyzmeti úshin» tósbelgisi tabys etildi. 
«Bizdiń salada 400-deı adam eńbek etedi. Olardyń ishinde óz qyzmetin adal atqaratyndar barshylyq. Mysaly, marapattalǵandar arasynan Abat Ibatovty erekshe atap ótýge bolady. Ol kúzetshilik qyzmetin atqarý kezinde qasqyrdy óltirip, áıel adamdy qutqaryp qaldy. Oblysta 8 orman sharýashylyǵy mekemesi bar. Salanyń jyl saıynǵy bıýdjeti 120 mıllıondaı teńgeni quraıdy. Sońǵy jyldary oblys basshylyǵy tarapynan eleýli kómek kórsetilip, mekemelerge jańadan órt sóndiretin tehnıkalar alyndy. Munyń nátıjesi de joq emes. Mysaly, 2015 jyly orman alabynda elý órt tirkelse, ótken jyly birdi-ekili oqıǵa ǵana oryn aldy», dedi «QazAqparat» tilshisine BQO tabıǵı resýrstar jáne tabıǵat paıdalanýdy retteý basqarmasynyń basshysy Amangeldi Dáýletjanov.
