Oralda úzdik memlekettik qyzmetshiler marapattaldy
Saltanatty sharada oblys ákimi Altaı Kólginovtiń atap ótkenindeı, budan on segiz jyl buryn Elbasymyz Nursultan Nazarbaevtyń «Memlekettik qyzmet týraly» Zańǵa qol qoıǵany belgili. Osy kezeńde memlekettik qyzmet júıesi eleýli túrde jetildirildi. Memleket basshysy bıyl memlekettik qyzmet týraly ulttyq baıandamany qalyptastyrý qaǵıdasyn bekitse, odan buryn «100 naqty qadam» Ult josparynyń bastapqy 15 qadamy kásibı memleket apparat qurýǵa arnalǵan bolatyn. Munyń bári atalmysh salada túbegeıli ózgeris-jańalyqtar júzege asyp otyrǵandyǵyn kórsetedi. Qazirgi zamanǵy maqsat-mindetterge sáıkes memlekettik qyzmetshilerge qoıylar talaptar kúsheıtilip keledi. Bul rette kásibı biliktilik pen bilim aldyńǵy orynǵa shyǵady. Bıyl óńirde attestattaýdan úsh myńnan astam adam ótip, jýyrda qorytyndylary shyǵaryldy. Synnan durys óte almaǵan 20 adam qyzmetinen tómendetýge usynylsa, 221-i joǵary laýazymdarǵa aýysýǵa múmkindik aldy. Qalǵandary óz oryndaryna laıyq dep tanyldy. Bul memlekettik qyzmetshilerdiń óz mindetterin barynsha adal atqaryp kele jatqandyǵyn pash etedi.
Jıynda sondaı-aq QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamentiniń basshysy, ádep jónindegi keńes tóraǵasy Bolat Isaqov, sala ardagerleri Nájimeden Esqalıev, Esbergen Ájibaev memlekettik qyzmetshilerdi tól merekelerimen quttyqtap, aldaǵy ýaqytta da abyroı bıiginen kórine berýlerine tilektestigin bildirdi.
Shara barysynda jas mamandar saltanatty túrde ant berdi. Olardyń qatarynda Batys Qazaqstan ınnovatsııalyq-tehnologııalyq ýnıversıtetiniń túlegi, taıaýda Zelenov aýdany ákimdigi kásipkerlik bólimine býhgalter bolyp qyzmetke ornalasqan Gúlnur Bestaýbaeva da bar. Al Oral qalasy ákimdiginde 35 jyl boıy úzdiksiz qyzmet atqaryp kele jatqan personaldy basqarý bóliminiń basshysy Aısulý Vaıdıeva «Úzdik memlekettik qyzmetshi» tósbelgisin alǵandar qatarynan tabyldy. Sala ozattaryna sondaı-aq oblys ákimi men atalmysh departament basshysynyń alǵyshattary da tabys etildi.
