Oralda úzdik kolledjder marapattaldy

ORAL. QazAqparat - Jastar shyǵarmashylyǵy ortalyǵynda QR Táýelsizdiginiń 25 jyldyǵyna oraı óńirdegi tehnıkalyq jáne kásibı bilim berý uıymdary arasynda «Birlik pen jasampazdyqtyń 25 jyly» atty festıval márege jetti, dep habarlaıdy QazAqparat tilshisi.

Onda oblys ákimi Altaı Kólginovtiń atap ótkenindeı, óńirde 38 kolledjde 20 myńdaı shákirt bilim alsa, olarǵa 10 myńdaı pedagog dáris beredi. Elbasy jastardy jumysshy mamandyqtaryna oqytýǵa udaıy kóńil bólip, qoldaý kórsetip keledi. Sonyń bir dáleli, aldaǵy jyldan bastap jastar jumysshy mamandyqtaryna tegin oqıtyn bolady. Jumysshy mamandyqtary qaı ýaqytta da qajet. Burynnan bar óndiris oshaqtaryna qosa jańadan ashylyp jatqan kásiporyndarǵa bilikti mamandar kerek. Sondyqtan kolledjder shákirtterine sapaly bilim berýdiń mańyzy zor.

Tehnıkalyq jáne kásibı bilim berý salasynyń shırek ǵasyr ishindegi tabys-jetistikterin kórsetýdi maqsat etken shara barysynda úzdik shyǵarmashylyq jumystar kórmesi uıymdastyrylyp, stýdentterdiń ınnovatsııalyq jobalary qoıyldy. «Indýstrıaldy jáne ınnovatsııalyq Qazaqstan» atty baıqaý qorytyndysyna sáıkes Eńbek jáne áleýmettik qatynastar akademııasynyń Batys Qazaqstan akademııalyq kolledji «Nurly Otanymyz - táýelsiz Qazaqstan» (hormen oryndaý), aýyl sharýashylyǵy kolledji «Uly dala eli - táýelsizdiktiń 25 negizi», Zelenov aýdanyndaǵy Rýbejın kolledji «Máńgilik elim - Qazaqstan» (án), ekonomıka jáne aqparattyq tehnologııalar kolledji «Gúldene ber, Qazaqstan!» (bı) atalymy boıynsha oza shaýyp, laýreat atandy.

Festıval barysynda sondaı-aq Oral polıtehnıkalyq kolledjiniń dırektory Qanat Qyryqbaev «QR bilim berý isiniń qurmetti qyzmetkeri», Aqjaıyq agrarlyq-tehnıkalyq kolledjiniń dırektory Baqytjan Qospaev Y.Altynsarın tósbelgisimen marapattaldy. QR Bilim jáne ǵylym mınıstrliginiń qurmet gramotalary da tabys etilip, shara sońy merekelik kontsertke ulasty.