Oralda úzdik energetıkter marapattaldy
ORAL. QazAqparat - Ǵ.Qurmanǵalıev atyndaǵy oblystyq fılarmonııa zalynda «Jaıyqjylýqýat» AQ-nyń saltanatty jınalysy bolyp, energetıka ónerkásibi qyzmetkerleriniń kásibı merekesi atalyp ótildi, dep habarlaıdy QazAqparat tilshisi.
Onda oblys ákiminiń orynbasary Baǵdat Azbaevtyń atap ótkenindeı, atalmysh kásiporyn Oral qalasyn jylýmen qamtıtyn asa mańyzdy nysan bolyp tabylady. Oralda jylý-qýat ortalyǵyn salý týraly sheshim 1952 jyly qabyldanyp, kelesi jyldan turǵyzyla bastaǵan. 1960 jyldyń jeltoqsanynda alǵashqy týrboagregat iske qosylsa, 1961 jyly jylý jelileri salyna bastady. Alpysynshy jyldarǵa deıin óńirde ortalyqtandyrylǵan elektr jáne jylý qýatynyń kózi bolǵan joq. Oral mehanıkalyq, armatýra, «Zenıt» zaýyttaryndaǵy lokaldy dızeldi elektr stansalarynyń kúshi qalanyń shaǵyn ǵana bóligin qamtýǵa jetetin. «Jaıyqjylýqýat» AQ kásiporny 1996 jyly qurylyp, keıin Úkimettiń qoldaýymen Oral jylý-qýat ortalyǵyna ozyq tehnologııa negizinde jumys jasaıtyn japondyq gaztýrbınaly qondyrǵy ornatyldy. Munyń mańyzyn kezinde Elbasynyń ózi atap kórsetken bolatyn.
Saltanatty shara barysynda úzdik qyzmetkerlerge oblys ákiminiń alǵyshattary, Qazaqstan elektr energetıkalyq qaýymdastyǵynyń «Eńbek sińirgen energetık», «Qurmetti energetık» ataqtary men qurmet gramotalary tabys etildi.
Aıta keteıik, «Jaıyqjylýqýat» AQ-da qazirgi tańda 1125 adam eńbek etse, sonyń 210-y - ınjener-tehnıkalyq qyzmetkerler, 915-i - jumysshy mamandar.
