Oralda «Úzdik dárigerge deıingi kabınet» baıqaýynyń jeńimpazdary anyqtaldy
ORAL. QazAqparat - Oblystyq oknologııalyq dıspanserde «Úzdik dárigerge deıingi kabınet» baıqaýynyń jeńimpaz-júldegerleri anyqtaldy, dep habarlaıdy «QazAqparat» tilshisi.
Atalǵan baıqaý dárigerge deıingi kabınetterde sapaly medıtsınalyq qyzmet kórsetýshilerdi yntalandyrý, qazirgi zamanǵy talaptarǵa tolyq saı keletin medbıkelerdi daıarlaýǵa nazar aýdarý, olardyń biliktiligin arttyrý maqsatynda uıymdastyryldy. Mundaı kabınette orta býyn medıtsına qyzmetkeri jumys jasaıtyny belgili. Oblystyq onkologııalyq dıspanser basshysynyń orynbasary Nurlan Tólemisovtiń aıtýynsha, medbıke alǵashqy qan taldaýlaryna qarap-aq aýrý belgilerin dál ajyrata bilýi tıis. Sonyń ishinde qaterli isik aýrýlary neǵurlym erte anyqtalsa, emdeý soǵurlym nátıjeli bolmaq.
Saıysqa qatysýshylar aldymen ózderin tanystyryp, sodan keıin naqty is ústinde synǵa tústi. Baıqaý qorytyndysynda «Medıtsına ortalyǵy» JShS medbıkesi Aqbota Hamıdýllına birinshi, №4 qalalyq emhanadan kelgen Nellıa Ýrgarcheva ekinshi, №5 qalalyq emhanadan Altyngúl Qalıeva úshinshi oryndy ıelendi.
