Oralda uıaly telefon urlyǵynyń tek 22 paıyzy ǵana ashylyp otyr
ORAL. QazAqparat - Oralda ár úshinshi urlyq uıaly telefonǵa qatysty bolyp otyr. Bul týraly qala prokýrory Aıdyn Rashıdovtyń tóraǵalyǵymen ótken vedomstvoaralyq keńeste aıtyldy, dep habarlaıdy «QazAqparat» tilshisi.
BQO prokýratýrasynyń baspasóz qyzmetinen túsken málimetke qaraǵanda, bıylǵy tórt aıda 486 uıaly telefon urlyǵy tirkelgen, bul ótken jylǵydan (592) 17,9 paıyzǵa az. Bul rette 109 qylmys nemese 22 paıyzy ǵana ashylǵan.
Taldaý kórsetkenindeı, 157 telefon (ótken jyly osy merzimde 124) qoǵamdyq kólikte, 72-si (38) páter, úılerden, jataqhanalardan, 32-si (43) túngi klýbtar men meıramhanalarda, 17-si (24) avtokólikte, 9-y oqý oryndarynda jáne beseýi medıtsına mekemelerinde urlanǵan. Turǵyn úılerde ádette telefondar adamdardyń erkin kirýi arqyly urlanady. ıAǵnı úı ıeleriniń ózderi shaqyrǵan «qonaqtary» úptep ketedi. Osyndaı 58 urlyq jasalǵan. Aıta keteıik, tirkelgen páter urlyǵynyń (308) árbir besinshisi uıaly telefonǵa qatysty. Sondaı-aq qoǵamdyq kólikte telefon (157 nemese 32,3 paıyz) kóp urlanady.
Telefondardyń 69 paıyzdaıy jábirlenýshilerdiń qaltasynan qoldy bolǵan. Urlanǵan telefondardyń 169-ynyń quny 50 myńǵa deıin, 199-y 100 myńǵa deıin, 100-iniń baǵasy 100 myń teńgeden asady. Jábirlenýshilerdiń kópshiligi - áıelder (324-i nemese 66,6 paıyzy) jáne mektep oqýshylary. Qalta urylary ádette er adamdarǵa jolaı bermeıdi.
