Oralda úı órtenip, júkti áıel men bala aýrýhanaǵa tústi
ORAL. QazAqparat - Búgin Oral qalasynda jer úıde órt bolyp, eki adam aýrýhanaǵa tústi, dep habarlaıdy QazAqparat tilshisi.
BQO Tótenshe jaǵdaılar departamentiniń baspasóz hatshysy Nurgúl Muqanovanyń aıtýynsha, saǵat 04.39-da S.Seıfýllın kóshesi №33/1 mekenjaıynda jeke úıdiń as bólmesinde jıhaz ben jeke zattar janǵany jóninde habar túsken.
Dál osy ýaqytta jedel járdem qyzmetine de qońyraý shalynǵan.
Oblystyq densaýlyq saqtaý basqarmasynyń baspasóz hatshysy Aınagúl Saqposynovanyń naqtylaýynsha, jedel járdemge habar saǵat 04.39-da túsken. 04.42-de brıgadanyń eki toby oqıǵa ornyna jetken. 1992 jylǵy júkti áıel qalalyq kópbeıindi aýrýhanaǵa jetkizildi. 2013 jylǵy qyz oblystyq kópbeıindi balalar aýrýhanasyna tústi. Gazben jeńil dárejede ýlanǵan 1997 jylǵy áıel adam aýrýhanaǵa jatýdan bas tartty.
Órt 12 sharshy metr aýmaqty sharpydy. Tilsiz jaý 05.06-da oqshaýlanyp, 05.45-te aýyzdyqtaldy.
Aldyn ala boljam boıynsha, ot elektr quraldaryn paıdalaný kezinde órt qaýipsizdigi erejesin saqtamaýdan shyqqan.
Oqıǵa ornyna BQO TJ departamenti órt sóndirý jáne apattyq-qutqarý jumystary qyzmetinen 8 qyzmetker men 3 tehnıka jáne qalalyq ishki ister basqarmasynan tergeý toby (3 qyzmetker, 1 tehnıka) bardy.
