Oralda ústine fýtbol qaqpasy qulaǵan 11 jasar bala kóz jumdy

ORAL. QazAqparat - Oralda ústine fýtbol qaqpasy qulaǵan 11 jasar bala kóz jumdy, dep habarlaıdy QazAqparat tilshisi.

BQO densaýlyq saqtaý basqarmasynyń baspasóz hatshysy Aınagúl Saqposynovanyń aıtýynsha, oqıǵa keshe keshkisin S.Datuly kóshesi, 17 mekenjaıynda boldy.

«Balalar alańynda 2011 jylǵy ul balanyń ústine fýtbol qaqpasy qulap ketken. Saldarynan ashyq jáne jabyq bas-mı jaraqatyn alǵan bala saǵat 22.10-da jaqyn mańdaǵy emdeý mekemesi - qalalyq kópbeıindi aýrýhanaǵa jetkizildi. Dárigerlerdiń bar kúsh-jigerin jumsaǵanyna qaramastan, bala jarty saǵattan keıin qaıtys boldy», - dep habarlady vedomstvodan.

Eske sala keteıik, budan buryn Oralda belgisiz jándik shaǵyp alǵan 9 jasar balanyń jansaqtaý bóliminde jatqanyn, Batys Qazaqstan oblysynda 5 jasar balanyń sýǵa ketkenin jazǵan bolatynbyz.