Oralda úshinshi qabat terezesinen qulap ketken 5 jasar bala aýrýhanaǵa jatqyzyldy

ORAL. QazAqparat - Oralda úshinshi qabat terezesinen qulap ketken 5 jasar bala aýrýhanaǵa jatqyzyldy, dep habarlaıdy QazAqparat tilshisi.

BQO Tótenshe jaǵdaılar departamentiniń baspasóz qyzmetinen túsken málimetke qaraǵanda, oqıǵa búgin saǵat 11.06-da S.Esqalıev kóshesi 227-mekenjaıynda ornalasqan bes qabatty úıde boldy.

«Ata-anasynyń qaraýynsyz qalǵan 2017 jylǵy bala úshinshi qabattan qulap ketken. Aldyn ala málimet boıynsha balanyń jaǵdaıy ortasha, jabyq bas-mı jaraqatyn alyp, mıy shaıqalǵan. Oń ıyǵy shyqqan», dep habarlady vedomstvodan.

BQO densaýlyq saqtaý basqarmasynyń baspasóz qyzmeti aqparattyń keıin beriletinin jetkizdi.

Eske sala keteıik, budan buryn Oralda tok soqqan eki er adamnyń jansaqtaý bóliminde jatqanyn jazǵan bolatynbyz.

Jansaqtaý bóliminde jatqan er adam ótken senbi kúni kóz jumdy.

Qazirgi kezde bul oqıǵa boıynsha komıssııa tekserý jumystaryn júrgizýde.